Schweizimiut Kangilinnguani nunalerinermik ilinniarfiliulersaartut
KANGILINNGUIT: Piujuaannartitsinissaq aallaavigalugu nunalerinerup kalaallinut ilinniartitsissutigineqarsinnaanissaa takorloorneqarpoq.
Schweizimi suliffeqarfiup imminut pigisup 3HF-ip Kangilinnguani Sakkutooqarfiusimasumi nunalerinermik ilinniarfissamik ammaasinnaanissani kissaatigaa.
Meeqqat inuusuttullu inuussutissalerinermik nunalerinermillu ilinniarsinnaanissaat siunertaavoq, naatitanik Kujataani ineriartortitsinermisut ittunik ilinniartitsinikkut nammineq pilersulersinnaanissaq aamma eqqarsaatersuutigineqarluni.
Nunalerinermik ilinniarfissap inuussutissanik nammineq pilersortussaanissaa aamma eqqarsaataavoq, seqernullu nukinga atorlugu ingerlatsisoqarnissaa aamma anguniagaalluni.
Schweizimi suliniaqatigiiffik 3HF Hansjürg Hessimit aallartinneqarpoq, Haitimilu Filippinerinilu assigiinngitsutigut ikiuiniarlunilu ineriartortitseqataalluni.
Kangilinnguani Sakkutooqarfimmi nunalerinermik ilinniarfeqalernissaanut siunnersuut, Folketingip Kalaallit Nunaannut tunngasunut ataatsimiititaliaanut nassiunneqarnikuuvoq, ataatsimiititaliamilu tassa oqaluuserineqartussanngussalluni.
3HF-ip nittartagaa uunga alakkarneqarsinnaavoq: www.3hf.org
