Sara Olsvig: Kangilinnguit salinneqarli
Amerikamiut danskillu sakkutooqarfigisimasaat atorunnaarnikut nunataasa salinneqarnissaat, Folketingimi ilaasortap, Sara Olsvigip (IA) maanna piumasaraa.
Allattoq Sara K. Jakobsen
aggustip 15-at 2014 07:05
Kangilinnguani sakkutooqarfiusimasup danskit sakkutooqarfiannit salinneqarnissaa, Sara Olsvigip illersornissamut ministerimik, Nicolai Wammenimik pingasunngormat ataatsimeeqateqarnermini piumasaraa.
Kangilinnguani uuliarluernerit ataatsimiinnermi ilaatigut eqqartorneqarlutik Sara Olsvigimit isornartorsiorneqarput aamma sakkutooqarfiusimasup kikkuugaluarnersunit pisiarineqarnerani, pisisunit Kangilinnguup nunataata salinneqarnissaanik sakkutuut piumasaqaataat aamma isornartorsiorlugu.
- Kangilinnguit salinneqarnissaat danskit illersornissakkut oqartussaannit salinneqartariaqartoq, Illersornissaq pillugu ministerimut taassumalu siulianut erseqqissumik piumasarisareerpara, maannalu aamma taamaaliorlunga, Sara Olsvig oqarpoq.
Amerikamiut aamma saliissapput
Kangilinnguit salinneqarnissaannik Sara Olsvigip piumasaqarnermi saniatigut aamma piumasaraa, Naalagaaffiit Peqatigiit ataatsimiititaliaata, Permanent- and Joint Committeep ataatsimiinnissaanni, Kalaallit Nunaata, Danmarkip aamma USA-p peqataaffigisassaanni, Illersornissamut ministeri saqqummiussiumaartoq piumasaralugu amerikamiut sakkutooqarfigisimasaasa USA-mit salinneqarnissaat.
- Naak amerikamiut nunarsuaq tamakkerlugu sakkutooqarfippassuaqaraluartut aamma Nunatsinni sakkutooqarfigisimasaminnik saliinissaat ilimanarpallaanngikkaluartoq, taamaattoq isumaqarpunga Naalagaaffiit Peqatigiit ataatsimiititaliaat assigiinngitsut aqqutigalugit tamanna eqqartortuartariaqaripput, Sara Olsvig oqarpoq imalu nangilluni.
- Aamma ilisimavarput Nunatsinni amerikamiut sakkutooqarfigisimasaasa salinneqarnissaannik piumasaqarutta taamaaliortoqarluni, taava nunani allani sakkutooqarfigisimasatik akissaajaatigalugit salittariaqalissagaat.
Inuit Ataqatigiit siulittaasuat aamma Folketingimi ilaasortaq, Sara Olsvig taama oqarpoq.
