Kangilinnguit takornariarfinngortinnissaannut Illersornissaqarfik apeqqutaassaaq
Folketingip Kalaallit Nunaannut tunngasunut ataatsimiititaliaa Kangilinnguit qanoq iliorluni takornariartarfinngortinneqarsinnaaneranut isumassarsialimmik qaammatip ataatsip iluani aappassaanik ataatsimeeqateqassaaq.
Tamatumuuna feeriartarfik takornarianut 250-it missaanniittunut inissaqartitsisoq pineqarpoq. Taanna suliffeqarfimmit Namminersorlutik Oqartussanit ingerlanneqassaaq, aningaasallu Illersornissaqarfiup naalagaaffiup illuutaanik isaterinissaanut atugassaralui suliffeqarfimmut tassunga tunniunneqassapput.
Aamma atuaruk Kangilinnguit salinneqarnissaa suli isumaqatigiissutigineqanngilaq
Siunnersuuteqartoq tassaavoq soraarneq Kjeld Wetlesen meeraalluni Kangilinnguani ukiuni marlussunni najugaqarsimasoq. Taanna isumaqarpoq nunaqarfimmi pissutsit takornariarfiusinnaaneranut piukkunnaateqarluartut, soorlu assersuutigalugu Sarfaq Ittuk aammalu umiarsuit takornariartaatit tassuunaqqussinnaammata.
- Sumiiffiup alianaalluinnartuunera tamatta isumaqatigiissutigisinnaagunarparput. Tamannalu feeriartarfiliornissamut atorluarneqarsinnaasoraara, danskit, amerikamiut, norgemiut kalaallillu iluaqutigilluarsinnaagaluarpaat, asuli illuutit piiaannarnagit, Kjeld Wetlesen KNR-imut taama oqarpoq.
Aamma atuaruk Peter Barfoed: illunik pitsaalluinnartunik asuli eqqaaneruinnassaaq
Aningaasalersuisussaqanngilaq
Kisimiinngilarli. Aamma illuliassanik titartaasartoq Peter Barfoed uumassusilinnillu ilisimatooq Andreas Brogaard Buhl Kalaallit Nunaannut tunngasunut ataatsimiititaliamut saqqummiussaqarsimapput. Taakku ilaatigut Kangilinnguit imaatigut timersuutinut misigisassarsiorlunilu takornariartitsinermut piukkuppaat aammalu sumiiffimmi ilisimatusarfiliornissamut isumassarsiaqarlutik.
Isumassarsialli assigiissutigisaat tassaavoq aningaasalersuisussaqannginnera, Visit Greenlandimi pisortaaneq Anders Stenbakken KNR-imut taama oqarpoq.
- Maannamut saqqummiunneqartut isumassarsiaannaapput. Arlallit isumaqarput uggornassasoq iliuuseqartoqartariaqartorlu (Kangilinnguit pillugit, aaqq.). Matumanili aalajangiisuusinnaasut amigaataapput, ilaatigullu angalatitsiviit angalatitsisartullu tikkuarlugit.
Aamma atuaruk Kangilinnguani saliinissamut suliffeqarfiit tallimat neqeroortussanngortut
Taassuma aningaasalersuerusussinnaasut marlussuit peqatigalugit 2014-imi upernaakkut Kangilinnguaniippoq. Aningaasalersuerusuttut sakkutooqarfiusimasoq takornariarfissatut piukkullugu soqutigisimavaat.
- Angusaqartoqanngilarli. Oqartoqarsinnaavoq aningaasartuutit amerlavallaartut aammalu aningaasalersuisussat aningaasaliinissaannut nalorninartut amerlavallaartut, Anders Stenbakken taama oqaluttuarpoq.
Kjeld Wetlesen Kangilinnguani feeriartarfiliornissamik isumassarsiaminik itisiliilluni saqqummiusseqqullugu Folketingip Kalaallit Nunaannut tunngasunut ataatsimiititaliamit sapaatit-akunnerata tulliani qaaqquneqarsimavoq.
Illersornissaqarfilli suliariumannittussarsiuussinissami avinnissaanut pilersaaruteqanngitsoq Illersornissamut ministereqarfimmi Illuutinut aqutsisoqarfik KNR-imut ilisimatitsivoq.
