Kangilinnguit isatertussanngoraat
Kangilinnguani sakkutooqarfik 2014-imi septembarip qaammataani matuneqarpoq, saliinissarlu danskit Illersornissaqarfiata ataani Illuutinut aqutsisoqarfiup suliariumannittussarsiuussineq annertooq maanna aallartisarpaa tassungalu atatillugu suliffeqarfinnik sanaartusagassanik suliassinneqartartunik sakkutooqarfiusimasumi saliinissamut pissarsiorluni.
Sanaartugassalerisunut atuagassiaq Licitationen taama allaaserisaqarpoq.
AAMMA ATUARUK Sara Olsvig: Kangilinnguit salinneqarli
Sakkutooqarfik saliiffigineqartussaq hektarit 250-it missaannik annertussuseqarpoq, illut 80-iullutik uuliaasiviillu assigiinngitsunik angissusillit 40-llutik.
Suliariumannittussarsiuussinermi atortussani allassimavoq isumaqatigiissuteqarnermi suliassat tassaassasut isaterinissaq, avatangiisinik saliinissaq aammalu sumiiffimmi pinngortitamik iluarsaassinissaq.
- Suliassaq annertooq suliariumannittussarsiuupparput. Illoqarfimmi tamakkerlugu peerneqartussaavoq, ilaatigut najugaqarfiit, timersortarfik, niuertarfik, innaallagissiorfik qatserisartoqarfillu peerneqassallutik, danskit Illersornissaqarfiata ataani Illuutinut aqutsisoqarfimmi suliniutinik aqutsisoq, Birgitte Weber Blicher taama oqaluttuarpoq.
AAMMA ATUARUK Kangilinnguit takornariarfittut ineriartortinneqarlik
AAMMA ATUARUK Schweizimiut Kangilinnguani nunalerinermik ilinniarfiliulersaartut
Piukkunnartussarsiornermi atortussat naapertorlugit, saliinissaq 300 millionit koruunit pallillugit naleqassangatinneqarpoq, Birgitte Weber Blicherillu erseqqissarpaa suliassanut assigiinngitsunut suliaqartussanik assigiinngisitaartunik pisariaqartitsisoqassasoq.