KANGILINNGUIT Kangilinnguani illuutit illersornissamut ataatsimiititaliami oqaluuserileraat

Folketingip illersornissamut ataatsimiititaliaata illersornissamut ministeri isumasioqatigiinnissamut aggersarsimammagu, Siumumeersup Aleqa Hammondip iluarisimaarpaa.

Illersornissaqarfiup Kangilinnguani suliariumannittussarsiuussinerata allanngortinneqarnissaanut neriuuteqalersitsivoq. Kangilinnguani illuutit tuniniarneqaqqikkaluassammata.

- Tamanna isumaqarpoq Kangilinnguit siunissaannut allatut takorluuisinnaanngornerput.

Aamma atuaruk Siulittaasoq: Kangilinnguani illuutit Namminersorlutik Oqartussat nammineerlutik akilertariaqassavaat

Illersornissamut ataatsimiititaliap siulittaasua Rasmus Jarlow isumaqarpoq, danskit naalagaaffiata Kangilinnguani mingutsitsinerup salinneqarnissaa suli akisussaaffigigaa.

Tamanna Siumut Inuit Ataqatigiillu assut aalajangiusimasivaat.

Illuutilli avatangiisinik saliinermut ilanngullugit piiarneqanngippata tamannalu Illersornissaqarfimmut akitsorsaataassappat tamanna  Kalaallit Nunaata akilertariaqaraa, Rasmus Jarlow isumaqarpoq.

Aamma atuaruk KANGILINNGUIT Neqeroornissamut piffissaliussaq kinguartinneqartoq

Tamannali Aleqa Hammondip oqaaseqarfigisinnaanngilaa.

- Tamanna oqaaseqarfigerusunngilara, nutaamimmi suliariumannittussarsiuussisariaqassaaq, piserusussiinnaasumut nutaanik piumasaqaateqartariaqassaaq.

Inuit Ataqatigiinneersup Aaja Chemnitz Larsenip Rasmus Jarlow aamma oqaaseqarfigerusunngilaa, erseqqissarluguli Nunatta Kangilinnguit tigussappagit tamanna Nunatsinnut koruunimik ataatsimilluunniit akeqassanngitsoq.

Folketingimi Kalaallit Nunaat pillugu ataatsimiititaliaq ullumi sisamanngornermi ataatsimiilerpat aamma Kangilinnguit eqqartorneqassapput.

AAMMA ATUARUK Demokraatit: Kangilinnguit nunatta karsianut aningaasartuutaassanngilaq

Aamma atuaruk Suliariumannittussarsiuussineq ingerlatiinnarneqarniarpasippoq

Aamma atuaruk Suliariumannittussarsiuussinissamut Kalaallit Nunaat aalajangiissaaq