Canada: Kangiata Illorsuanik titartaasut naggueqatigiit inuit illorsuassaannik unammisitsinermi ajugaasoq
Inuit kulturiannik oqaluttuarisaanerannillu kingornussassaq oqaluttuarlu Canadami namminerisamik inissisimaffeqalissaaq.
Tamanna pissaaq Nunavut Inuit Heritage Centre - inuit kulturikkut kingornussassanut illorsuassaat - Canadami Nunavunni illoqarfiit pingaarnersaat Iqaluit avannaata tungaani piviusunngortinneqarpat.
Illorsuassamillu titartaasoq tassaavoq illussanik titartaasarfik Dorte Mandrup, Ilulissani Kangiata Illorsuanik aamma titartaasimasoq.
Illussanik titartaasarfiit allat pingasut kiisalu ingeniørit ilusilersuisullu ingerlatseqatigiiffii arlaqartut peqatigalugit illussanik titartaasarfik illorsuassap sinaakkuserneqarnissaanik unammisitsinermi ajugaasimavoq. Tamanna illussanik titartaasarfiup nittartagaani allassimavoq.
- Inuiaqatigiit inuit ornittagassaannik qasusuillutik sivisuumik suliniarsimapput, tassani kinguaariinni aggersuni pisariaqartilluinnarneqartunik annaaneqarnissaannillu navianartorsiortinneqartunik kingornussassanik nalituunik katersisoqarsinnaassalluni ilisimasanillu immikkuullarissunik immikkullu ilisimasaqarfiusunik avitseqatigiittoqarsinnaassalluni, pilersitsisoq pinngorartitsinermullu pisortaq, Dorte Mandrup, tusagassiorfinnut nalunaarummi oqarpoq.
- Tusarnaarnissamut, ilinniarnissamut kiisalu eqqarsaatit ilusillu akornanni attaviliisuunissamut qilanaaqaagut.
Illussanik titartaasarfiup Dorte Mandrupip nittartagaani suliniummik nassuiaat naapertorlugu ilusaa nunap isikkuanit, apummit anorillu sammiviisa ingerlaartarnerannit aaneqarsimavoq.
Illorsuaq taamaalilluni qaqqap sivingarnani sananeqassaaq Iqalunnut isikkiveqarluni.
Canadami inunnut kulturikkut kingornussassanut illorsuarmut nutaamut pilersaarutit Nunavunni 1993-imi isumaqatigiissutinit tunngaveqarput, tassani Canadami inuit Nunavunni nunap immikkoortuisa ilaannik piginnittuunerat qulakkeerneqarmat.
Inuit kulturiannik kingornussassaannillu attassinermut nalliussinermullu katersuuffiunerata saniatigut illorsuaq ilaatigut aamma aannaveersaanermut laboratoriaqassaaq, pisiniarfeqarluni, ulluunerani paaqqinnittarfeqarluni, unnuisarfeqarluni, arlalinnik allaffeqarluni angisuumillu silamiiffeqassalluni.
