Kangiani nunat Issittoq ataatsimiissutigileraat

Japanip, Korea Kujalliup Kinallu Issittumi soqutigisatik pillugit Korea Kujalliup illoqarfiisa pingaarnersaanni Seoulimi ullumi sisamanngornermi ataatsimiissutigissavaat. Korea Kujalliup nunanut allanut tunngasunut ministereqarfia taama nalunaaruteqarpoq, aviisimilu The Japan Timesimi aamma allaaserineqarluni.
Assi © : Michael Ransburg/Flickr Creative Commons
Allattoq Karsten Sommer
apriilip 28-at 2016 07:56
Nutserisoq Mads Lynge

Nunanut allanut tunngasunut mininstereqarfimmi ataatsimiittoqassaaq, Japanip Issittumut tunngasunut aallartitaa Kazuko Shiraishi, Korea Kujalliullu aallartitaa Kim Chan-woo Kinallu aallartitaa Ma Xinmin peqataassallutik.

Nunat taakku pingasut Issittoq pillugu politikkitik ataatsimiinnermi eqqartussavaat, Issittumi ilisimatuussutsikkut misissuinerit eqqartorneqartussanut ilaallutik.

Japan, Korea Kujalleq Kinalu Issittumi Siunnersuisoqatigiinni alaatsinaattutut ullumikkut inissisimapput, 2013-imi maajimi alaatsinaattunngorlutik.