Kangiamiut nunatsinniittut: Allamiuunerput tunngavigalugu nikassagaanngilagut
Nunani allamiut nunatsinniittut aatsaat taama amerlatigilersut, KNR-imit sapaatip akunnerata siuliani oqaluttuaraarput.
Naatsorsueqqissaartarfiullu kisitsisaatai naapertorlugit 2017-p aallartinnerani nunami allamiut naalagaaffeqatigiinnerup iluani innuttaassuseqartuunngitsut katillugit 1.017-nik amerlassuseqarput, kisitsilli taanna ullumikkut marloriaatinngorsimavoq.
Nunani allamiut nunatsinni najugaqartut amerlanerpaartaat kangiamiuupput, taamaammat KNR-ip taakkunannga pingasut naapillugit sooq nunatsinnut nuussimanersut tusarniaaffigai.
50-inik ukiulik, Meena Manley Nuummi tagiartuisarfimmi naapipparput, taanna Nuummi ukiuni 16-ini najugaqarpoq.
- Maaniinnera nuannareqaara. Maani ilaqutaqarpunga, tikeqqaarama ukiut aqqaneq-marluk siulliit Thailandimiut neriniartarfianni sulivunga, kingorna nammineq tagiartuisarfiuteqalerpunga, Meena Manley KNR-imut oqaluttuarpoq.
Meena Manleyip uini danskiusoq nunatsinnukarusussimasoq taamaalillunilu nammineq malinnaasimalluni oqaatigaa.
- Siornatigut Hong Kongimi ukiuni arlalinni najugaqaraluarpunga, Hong Kongilu maanga naleqqiullugu allarluinnaavoq, maannalu ukioqqortusilaalerama inuuneq ulapiffiunngitsoq qinerusunnerulerpara, taamaammat suli maaniikkallassaanga, Meena oqarpoq.
Allamiuunertik pillugu maani nikassagaaneq ajortut
Pisiffimmi 33-nik ukiulik pisiniartitsisoq, Jelica Mirana Philippinerineersoq naapipparput. Taassuma ilaquttami pilersornissaanik Filippinerinilu siunissagissaarnerunissaminik qulakkeeriniarluni nunatsinnut nuussimalluni oqaatigaa.
- Kalaallit Nunaat uanga nunannut sanilliullugu periarfissaqarneroqaaq, maanilu akissarsiaqarneruvunga, tamannalu ilaquttama siunissaannut pitsaasuuvoq. Uigami meeqqakkalu Phillippinerini najugaqarmata qaammatit tamaasa aningaasanik nassittarpakka, Jelica Mirana KNR-mut oqarpoq.
AAMMA ATUARUK Suliffiutillit: Allamiut sulisorerusuppagut
Taassuma piffissap ilaani ilaquttaminut maqaasinini allanit annerusartoq oqaatigaa.
- Ullut ilaat oqinnerusarput ilaannili ilaquttakka maqaasisaqaakka, eqqarsartarpungali ajorunanngitsoq maanimi periarfissarpassuaqarpoq, taanna oqarpoq nangipporlu:
- Maani inuit inussiarneqaat ataqqineqarlutalu misigisarpugut, immikkoortitaanerillu misigineq ajorpagut.
Maani najugaqarneq toqqissisimanartoq
Neriniartarfimmi Bonesimi Sally 39-nik ukiulik Filippinerineersoq KNR-imit naapipparput, taanna ukiut 16-it nunatsinni najugaqarpoq.
- 2007-imi tikeqqaarama assorooqqaarpunga, sungiupparali maanimi sulineq nuannareqaara. Inuit inussiarnersuupput ilakkuminartuullutillu maaniinnera toqqissinartippara, Sally oqarpoq.
Taassumalu nunatsinni najugaqarnissap allanut innersuussinnaanissaa qularutiginngilaa.
- Kalaallit Nunaat nalunngisannut tamanut innersuuttarpara – pingaartumik Phillipinerinut, nunami allamiut maani amerliartuinnarnerat malugisaqaara pingaartumik Nuummi Phillipinererpassuanngorput.
Sooruna taamaassoraajuk?
- Maani sulineq nuannarigunarpaat, manna toqqissisimanaralugulu isumannaatsumiinnertik iluarigunarpaat, tamannalu uagutsinnut pitsaasuuvoq, Sally oqarpoq.
Taassuma siunissami allamiut amerlipiloornissai ilimagaa:
- Qularutissaanngilaq, mittarfissarsuaq ammarpat inuppassuit tikerassapput, Sally oqarpoq.