Suliffiutillit: Allamiut sulisorerusuppagut
- Taakkoqanngitsuuppat massakkut killiffipput tikissimanavianngikkaluarparput taanna qularnanngilaq, taakkoqanngikkaluarpammi suliffeqarfipput uaasorujorujussuulluni ingerlasimassagaluarpoq, Paamiuni Hotel Ivaanamik piginnittut aappariit Ortooraq Møller aamma Marie Johansen Møller oqarput, taakkumi hoteliutertik 2000-lli aallartilaarnerani pigilerpaat, aallarteqqaaramillu isumaqarsimagaluarput nunaqavissunik sulisoqassallutik, piviusorlli allaavoq.
Paasinarsivormi nunaqavissunik sulisoqarniarneq ajornakusoortorujussuusoq.
- Aallarteqqaaratta nunaqavissunik sulisoqarniartarnerput ajornakusoorsimaqaaq, pingaartumik akissarsiffiup nalaani, Ortooraq Møller oqarpoq.
Thailandimiunilli aappariinnik sulisoqalernikkut ajornartorsiut aaqqinneqarpoq.
- Thailandimiut 2014-mi sulisorilerpagut ullumikkorpiarlu (aaqqissuisoqarfiup apersuinerani marlunngornermi nov. 15-iani) kujammukarlutik aallarput. Ukulluitsuupput, tatiginartut sulilluartut aammalu asanartut, Ortooraq Møller oqarpoq.
Nunatsinni nunami allamiut aatsaat taamak amerlatigipput
Hotel Ivaanali kisimi nunami allamiunik sulisoqanngilaq.
Naatsorsueqqissaatarfiummi kisitsisaatai kingulliit naapertorlugit, nunatsinni sulifissaaleqisut taamaallaat 1.063-iupput, taamaammalluuna sooq nunami allamiut amerliartuinnarnerinut tamanna nassuiaatissaasimagunartoq, tassa nunami allamiut naalagaaffeqatigiinnerup iluaneersuunngitsut.
AAMMA ATUARUK Nunatsinni nunami allamiut aatsaat taama amerlatigisut
Nunamimi allamiut maanna nunatsinniittut 1.860-iupput, taakkunannga amerlanersaat kangiamiuullutik, soorluttaaq Hotel Ivaanami Thailandimiut aappariit aamma tamaaniittut.
Hello! Can I help you?
Paamiuniit avannarparteraanni, Nuummi cafeet ilaat Pascucci Nuuk Centerip iluaniippoq.
Taanna aappariit Krissie aamma Michael Winbergikkut pigivaat, taakkuttaaq nunaqavissunik sulisussarsiniartarnertik ajornakusoorutigisarpaat.
- Siunertarinikuugaluarparput nunaqavissunik sulisoqassalluta kisiannili ajornakusoortorujussuusoq paasinarsivoq. Aallarteqqaaratta ukiuni siullerni arlalialunni sulisutta affaat nunaqavissuupput ajunngivissumillu sulilluarlutik. Kisiannili ukiut kingulliit tallimat nunaqavissunik sulisussarsiniarneq ajornarluinnarsimavoq qinnuteqartoqanngilluinnarpormi! Sulisussarsiortuaraluarpugut nunaqavissunilli sulisussarsisinnaanngilluinnarpugut, Pascuccimik piginnittoq Krissie Winberg oqarpoq.
Ullumikkullumi Pascuccimi sulisut amerlanersaat kangiamiuupput, taamaammallu oqaatsit atorneqartut aamma tuluttuujummata pisiniat nerisassanik pisiniarnerminni tuluttoortussanngortarnertik naammagiinnartariaqarpaat.
-Piumanerugaluarparpummi cafeeutitsinni sassaallertarnitsinni kalaallit oqaasii atorneqassasut, ajornaqaarli qinnuteqartoqarnermi ajorpoq, caféuterpullu ingerlalluassappat allatut ajornartumik kangiamiunik sulisoqartariaqarpugut, Krissie Winberg oqarpoq.
