Kangerlussuarmi biilinik kingumut misileraavissuaqalissaaq

Nunaqarfik mittarfeqarfiusoq Kangerlussuaq, kingumut biilinik misileraavissuaqarfinngulerpoq. Arjeplog Test Managementip, naalisarlugu ATM-ip, nunaqarfiup aqquserngini, tasersuini nunataanilu biilinik misileraasalerniarpoq.

Suliffeqarfiup Kangerlussuup eqqaani biilinut ukiaru misileraaviliorfissaanut Qeqqata Kommuniata ippassaanikkunni nunaminertamik atugassippaa. Misileraavissap siornatigut biilinik misileraaviusimasoq Sermersuarmi kilometerinik 120-nik ungasitsigisumiittoq taarsissavaa. Ukiuni 1999-imit 2005-imut biilinik Sermersuarmi misilittaasoqartarsimavoq.

Misileraavissarsuaq mittarfimmut nunaqarfimmullu qanittumi inissisimassaaq. Kommunillu misileraavissuup najukkami suliffissanik amerlasuunik pilersitsisinnaanissaa neriuutigaa.

Ukiormannalumi oktobarimi novembarimilu misileraanermi suliffiit nutaat 20-30-t pilersinneqassagunarput. Misileraavissuarmik ataavartumik pilersitsoqariarpat Kangerlussuarmi sulffinnik 200-250-inik pilersitsisoqarsinnaassaaq.

Suliffeqarfik Arjeplog Test Manegement Sverigep avannaani Kinamilu misileraavissuaqareerpoq. Biililiorfissuit, ilaatigut BMW, biililiaasa nutaat tunisassiarineqalinnginnerini ukiukkut angallatiginissaat misilittartarpaat. Tamannalu maanna Kangerlussuarmi pisussanngorpoq.

Sermersuup qanitarisaani nunaviup silaannaata allanngujuitsuunera, takisuumik mittarfeqarnera aqqusinernilu isortuuni piffissami sivisuumi misileraasoqarsinnaanera Kangerlussuup biilinik misileraavissatut piukkunnaatigaa.