Asimi katittarneq takornariaqarnermut siuarsaaqataassaaq
Asaqatigiilluni pilluarnaqaaq. Pilluarnarnerpaasarporlu inuunerup sinnera najussalluni oqaluffimmi imminut angerfigigaanni. Oqaluffimmiinnarli katittoqartanngilaq.
Christina Jakobilu ikinngutitik ilagalugit Erik Palop angallataaanut ilaallutik ataasinngormat aallarput. Kangerlummut kusanarluinnartumukarnissartik siunertaraat.
- Asimi. Katilluni inuunerup sinnera najorniarluni angerneq kusanaqaaq, asimili avatangiisiginnerpaalluni katilluni soorlu pilluarnarnerusoq, Christina Kastanja Haxholdt Jacob Haxholdtimut katerlaaq oqarpoq.
Aappariit Nuummeersut imminnut tulluartumi katikkusussimapput.
- Asimi pisutsilluta naapeqqaarpugut, nulianngorlaaq oqarpoq.
Umiarsuup naalagaa katitsitseqqaartoq
Umiarsuup naalagaa Erik Palo perngaammik katitsitsivoq, pissangasimaqalunilu.
- Oqaasissakka nattaqqallisaarnangalu kukkunaveersaartussaagakkit pissangasimavunga. Naammassilluarparali.
Pinngortitami katititsisinnaaneq qangalili isumassarsiarisimavaa. Borgmesterillu Asii Chemnitz Narupip takornariaqarnermut suliniummik nutaamik aallartisaalermat isumassarsiani saqqummiussimallugu.
Immikkuullarissumi katittoqarsinnaanngussaaq
Katinnissamut pilersaartunut periarfissarpassuaqartoq sinnattuuvoq:
- Qaqqap qaani, kangerlummi, illuaqqami kuussuulluunniit eqqaani katititsisinnaaneq isumassarsiaraara. Tassalu sumiluunniit katissinnaaneq.
AAMMA ATUARUK Suiaqatiminoortut siullerpaallutik oqaluffimmi katittut
Nalilerneqarluarnissamullu periarfissatsialaalluni.
- Misigisaq tupinnaqaaq. Kangerluit kusanarnerpaat ilaanni angallammi Christinamut katilluni misigisaq imaannaanngilaq, uinngorlaaq Jakob Haxholdt oqarpoq.
Takornariat katikkusuttut qarmarusukkai
Kalaaleqatitta taama katisikkumaneqartalernissaat Erik Palop neriuutigaa. Nunanilluunniit allaneersut kajumilersinnaanerat aamma neriuutigalugu.
- Takornariat nunani allani sumiiffinni immikkuullarillutik pissanganartuni katittartut takusarparput.
AAMMA ATUARUK Takornarniat kuultisiortinneqarsinnaannissaannut periarfissiisoq
Periarfissallumi assigiinngeqaat.
- Elvis Presleyitut atukkersornissara ilimananngilaq, kissaatigineqavippalli taamaaliukutsoorsinnaavunga. Soormi, suna ajornarami?, Erik Palo oqarpoq
Katereernerup kingorna Qooqquni nereqatigiinnermit assilisaq.