Takornarniat kuultisiortinneqarsinnaannissaannut periarfissiisoq
Takornarnialerisummi ilaat Nuup Kangerluani takornarniat kuultisiorfigisinnaasassannik akuersissummik tunineqarsimavoq.
Takornarniat arfernik takuniaatinnagit, Sermimulluunniit iigartartumut takuniaatinnagit kuultisiorsinnaanissaat, Erik Palo Jacobsenip aasaq manna isumassarsiaraa:
- USA-mit Nunatsinnukarniartut iluatsikkakkit. Taakku Nunatsinnukarlutik isiginnaarutitigut nangeqattaartussamut atatillugu maanga immiussiartorniarput, kuultisiullammannillu taakku tikisitsisimapput, Erik Palo Jacobsen, takornarniat angallammik attartuiffigisinnaasaanni Arctic Boat Charterimi takornarnianik angallassisartoq oqarpoq.
Takornarniat nunaminermik kuultisiorfigisinnaasamik nassaarsimapput, immaminngaanniillu ungasippallaanngilaq:
- Aatsitassanik assigiinngitsunik taakku nassaarput, angallassinnaagakkillu nuanneqaaq, ikinngutitaaraakkalu. Kuulteqarfimmik taakku aamma nassaarput, Erik Palo Jacobsen oqarpoq.
Kuultisiortut Ice Cold Goldimeersut nassaarfitsik tikkuarpaat, umiatsiamillu aquttumut oqarlutik nammineq kuultisiortariaqaraluartoq. Kuultisiortut kajumissaarutaat Erik Palo Jacobsenip eqqaamavaa, annikitsumillu piiasinnaanissamut qinnuteqaat, Aatsitassanut Ikummatissanullu Aqutsisoqarfimmut nassiullugu.
Kikkulluunniit annikitsumik aatsitassarsiorsinnaanissamut ajornanngitsunnguamik, akisuallaanngitsumillu, qinnuteqarsinnaapput, maskiinalli angisuujunatillu sulisoqannginnissaq piumasaqaataalluni.
Nunaminertaq aatsitassanik ujarlerfiusinnaallunilu piiaaffiusinnaasoq 1 kvadratkilometeritut angitigisoq, Erik Palo Jacobsenip akuersissuteqarfigaa, takornarniallu tassunga angallassinnaallugit:
- Nunaminertaq annikitsumik piiaaffiusinnaasoq akuersissuteqarfigaara, takornarniallu tassunga angallassinnaavakka assersuutigalugulu kuultisiortissinnaallugit, Erik Palo Jacobsen oqarpoq.
Takornarnianik angallasisartup pissanngatigaa takornarniat periarfissaq tamanna atorniarneraat, taamaattoqassappallu iluatsittumillu piiaaffiusinnaalissanersoq, suliffeqarfiit Arctic Boat Charteritut ittut allat pilersinneqassanersut aamma pissanngatigalugu.
Takornarniat angallanneqartut kuultimik nassaassappata, kuulti nassaarineqartoq angallassisup oqartussaaffigissagaa, Aatsitassanut Aqutsisoqarfiup allagaataani takuneqarsinnaavoq. Immikkulli ittumik aamma isumaqatigiissusiortoqarsinnaavoq, assersuutigalugu takornarniat kuultimik piginnittuulersinnaassallutik, inatsisilli paasiuminaassinnaapput:
- Kuulti nassaarineqartoq soorunami nalunaarutigisartussaavara. Inatsisit taamaapput, taamaaliortoqareeraangallu kuulti nassaarineqartoq nalilerneqassaaq, akileraaruteqassallungalu soorunami, Arctic Boat Charterip piginnittua, Erik Palo Jacobsen, oqarpoq.
Inuit sapinngisamik amerlasuut aatsitassanik piiasinnaanissaat Namminersorlutik Oqartussat anguniagaraat, akuersissullu taamaammat 1000 koruuniinnarnik akeqartinneqarluni.
Atortut anginngitsut, tigummiinnarneqarsinnaasullu, piianermi atorneqarsinnaapput. Atortunik angisuunik atuiniaraanni, taava akuersissuterpassuit aatsaat aqqutigalugit piiaasoqarsinnaavoq, akiligassat amerlanerussapput, tusarniaasoqaqqaartussaallunilu.
