Kamikposten qineqqusaartoq pillugu kukkusumik paasissutissiisoq
Kamikposten.gl-imut ilanngutassiaq paasissutissanik eqqunngitsunik tunngaveqartoq, allattup Lars Andersenip nassuerutigaa, niitartakkamullu ilanngutassiani uppernarsaatissartaqannginnerarlugu.
- Aap, uppernarsaatissartaqavinngillat.
Lars Andersen kamikposten.gl-imi akisussaasutut imminut taasoq taama oqarpoq. Taanna Mexicomi najugaqarpoq, nittartakkamullu kamikposten.gl-imut allattartuulluni.
Inuussutissarsiornermik sulialik Nuummeersoq Nicolai Nissen nunatsinnut akileraarumasimannginnerarlugu pasinninini uppernarsaatissartaqanngitsut, Lars Andersenip nassuerutigaa.
Lars Andersenip nittartakkamut ilanngutassiani ima imalik kommunemut qinersinissaq aqaguttoq saqqummiuppaa:
- Borgmesteritut piukkussap Nicolai J. Nissenip Kommuneqarfik Seermersooq kommunenut allanut naligiissaarinermi akiliinerusaleqquaa, namminerli akileeqataarusunnani.
Nicolai Nissen piginneqatigiiffik Danmarkimi nalunaarsorneqarsimasoq aqqutigalugu HECA Nuuk A/S-imi piginneqatigiissutinik pisisimanerarlugu, Lars Andersenip nittartakkamut allaaserisamini tunngavilersuutigaa
- Taamaattumik danskit suliffeqarfiutaat Nicolai J. Nissenimik aqunneqartoq, sooq Kalaallit Nunaanni aningaasaliinissuussanersoq eqqumiiginarpoq, Lars Andersen allappoq.
KNR Nicolai Nissenimut saaffiginnippoq, HECA Nuuk A/S-imilu piginneqataassutisiarisimasani suliffeqarfimmit Kalaallit Nunaanni adresseqartumeersuusut, taamaattumillu Lars Andersen kukkusoq, taassuma KNR-imut uppernarsarpaa.
Lars Andersenip nittartakkamut ilanngutassiarisartakkami imarisai tusagassiortup allaaserisaatut taavai:
- Allatat ilai tusagassiortutut suliaapput, sinnerili tusagassiuutinut nalunaarutineersuullutik.
Taassuma Nicolai Nissen pillugu allaaserisani Sermitsiaq.ag aamma Børsen najoqqutaralugit allassimanerarpai, paasissutissalli ilumoortuunersut tassa misissoqqissimanngilai
Nicolai Nissenip kamikposten.gl politiinut unnerluutigaa taarsiissuteqarnissarlu pillugu eqqartuussissuserisumik misisissuititsilluni.