Kalaallit Tivolimi aggustip aallaqqaataani naapeqqittussanngorput: Qilanaarpugut
"Kalaallit Nunaat Tivolimi" 1976-imiilli aggustip aallaqqataanni pisartoq kalaallinit nunatsinneersunit Danmarkimiittunillu ornigarneqarluartarpoq.
Ukiuni marlunni kingullerni Corona peqqutigalugu "Kalaallit Nunaat Tivolimi" uninngasariaqarsimasoq ukioq manna kiisami pisussanngoqqippoq. Taamaammallu "Kalaallit Nunaat Tivolimi" pisussaqarnerulaartussaasoq aaqqissueqataasoq Carsten Siegstad oqarpoq.
-Tassa juulip naggataanni aallartittarpugut aggustip aallaqqaataat ilanngullugu. Juulip naggataanni kalaallit kulturiat ingerlanneqarnerussooq, soorlu uaaeertut, erinarsoqatigiit, inngertut taavalu unnukkiartulernerani nipilersortartut assigiinngitsut appillattaartalissapput.
Kalaallit Nunaat Tivolimi juulip naggataanni qilaatersortup Gaz Zaa Lung-ip nal. 13:05 qilaatersorluni ammassavaa.
Kalaallit Nunaat Tivolimi 2022-mi nipilersortussat
- Aqqa Band
- Aavaat
- Poulsen Band
- G-60
- Pele Møller Band
- Zikaza
Tivolimilu nipilersortussat nunatsinneersut arlaqarput. Vajgat Orkesterit Qullissat matuneranniit ukioq manna ukiut 50-nngornerat malunnartinniarlugu tusarnaartitsissapput, taakkualu saniatigut allanik aamma nipilersortussaqartoq Carsten Siegstad oqarpoq:
- Aggustip aallaqqaataani unnukkut G60-ikkut nerereernerup kingorna aallartissapput, taavalu Poulsen Bandikkut appissapput kingusinnerusukkullu Zikazakkut "Kalaallit Nunaat Tivoli" naggataarlugu nipilersussapput.
Foto: Tivoli.
Corona peqqutigalugu uninngagallarsimavoq
"Kalaallit Nunaat Tivolimi" ukiuni marlunni kingullerni Coronartoqarnera peqqutigalugu pinngitsoortarsimavoq. Maqaasineqarsimanerlunimi?
- Suu tassa assut maqaasinarpoq. Siorna annikitsumik kalaallit Tivolimi naapisimaarpugut, nipilersortartut maani Danmarkimi najugallit atornerullutigit, mattussaariataarnissaq annilaangassutigingatsigu. Taava ukioq manna annertungaatsiartumik uterfigeqqikkusullugu taamaattumik nipilersortartut ajorisassaanngilluinnaqqissaartut aamma qujanartumik angersimapput aggernissamut nipilersornissamullu.
Carsten Siegstadip oqaatigaattaaq katerisimaarnermut isilivinnermi isussutissarsisoqarsinnaasoq aammali Tivolip nittartagaata Tivoli.dk-p billitsinik tuniniaavinut iserluni akikinnerusumik isissutissarsisoqarsinnaasoq.
Aggiasoqarluarniissaalu aqqissuisunit neriuutigineqarpoq:
-Soorunalimi neriuppugut ukiut marlorsuit uagut kalaallit Tivolerpiarnikuunata, tamaani najugallit kalaallit aggiajumaartut aammalu neriuppugut nunatsinninngaanniit feeriarrattut aamma alakkalaarumaartut.
"Kalaallit Nunaat Tivolimi" kalaallit ilinniartut 25-t Tivolimi 1976-imi naapeqqaarnerannit aallaaveqartumut ukiut ingerlaneranni peqataasartut amerliartuaarsimapput, ukiunilu kingullerni 15.000-init ikinnerunngitsunit peqataaffigineqartartoq, aaqqissuisut ilisimatitsipput.