Lolland eqqartuussiviit qullersaannut ingerlatitseqqittoq: Kalaallit paarineqarnerannik akiliinissarput naapertuutinngilaq

Kalaallit Danmarkimi paarineqarnerannut tunngatillugu suliami Lolland Kommunep akiliisussanngortinneqarnini eqqartuussiviit qullersaannut ingerlateqqinniarpaa. Akiliinissarmi Namminersorlutik Oqartussat aamma naalagaaffiup akornanni isumagineqartariaqartoq borgmesteri isumaqarpoq.

Allattoq Helle Nørrelund Sørensen

marsip 29-at 2023 07:02

Nutserisoq Nathan Kreutzmann

- Aalajangiineq ingerlateqqissavarput.

Vestre Landsretip akiliisussanngortitsilluni aalajangiinera pillugu Danmarkimi Lolland Kommunemi borgmesteri Holger Schou Rasmussen (S) taama erseqqitsigisumik nalunaaruteqarpoq.

Angutip kalaallip eqqarsartaatsimigut innarluutillip pineqaatissinneqareernermi kingorna saassussisimasup paarineqarnerani Lolland Kommunep akiliisussanngortinneqarnera taassuma akueriumanngilaa.

Aamma atuarukSermersooq Danmarkimi kommuninit marlunnit akiliisussanngortinneqarnerminut eqqartuussivilersuinermi ajugaasoq

Saassussineq pivoq Lollandimi inissiisarfimmi matoqqasumi Kofoedsmindemi, angutip kalaalip kommunerisamini Kommuneqarfik Sermersuumi pinerlussimanini pineqaatissiissutigalugu tassani inissiisarfimmiitsinneqarnerani.

- Ilumoorsinnaanngilaq innuttaasup inissiisarfimmiitinneqarnermini pinerloqqinnerani Kalaallit Nunaata akisussaaffimminik qimarratiginninnissaa oqarlunilu: ´Uagut taanna innuttaasoriunnaareerparput, pissutigalugu innuttaasoq Sermersuup inissiisarfimmiititaa Danmarkimi inissiisarfimmiinnermini pinerlummat´, Holger Schou Rasmussen oqarpoq.

Borgmesteri: Akiligassaq Namminersorlutik Oqartussat naalagaaffiullu avillugu akilertariaqarpaat

Suliami aningaasartuutit saniatigut Lolland Kommune 2,4 millionit koruuninik Kommuneqarfik Sermersuumut akiliisassoq Vestre Landretip aalajangerpaa.

Randers Kommunep Kommuneqarfik Sermersuullu akornanni suliaq assingusoq aamma pineqarpoq. Tassani Randers Kommune 2,7 millionit koruuninik Sermersuumut akiliisussanngortinneqarpoq.

Vestre Landsret suliani marlunni aalajangiivoq:

- Suliap aappaa kalaallimut Rødbyhavnimi Lollandimiittumi Kofoedsmindemi paarineqartumut tunngasuuvoq. Eqqarsarsartaatsimikkut kinguarsimasut pinerlussimasut tamaani Region Sjællandimitt pigineqarlunilu ingerlanneqartumi paarineqartarput.

- Suliallu aappaa kalaallimut allamut Randers Kommunemi aamma paarineqartumut tunngasuuvoq.

Suliat taakku kalaallinut Kommuneqarfik Sermersuumi pinerluuteqarsimasutut pineqaatissinneqarsimasunut tunngasuupput. Nunarpulli eqqarsartaatsimikkut innarluutilinnut pinerluuteqarsimasunut inissiisarfeqanngimmat, Kommuneqarfik Sermersooq kalaallit taakku marluk Danmarkimi paarineqarnerannut akiliisarpoq.

Kalaallit eqqarsartaatsimikkut kinguarsimasut Danmarkimi kommunit ilaanni najugalittut nalunaarsoqqallutik paarineqartut pinerloqqinnertik pissutigalugu pillagaaqqittut paarineqarnerisa Danmarkimi kommunerisaannit akilerneqartassasut, Ankestyrelsen inerniliivoq.

Allisiguk

Suliarli aalassatitsisoq Kalaallit Nunaata pisuussutiginngikkaa Holger Schou Rasmussenip erseqqissarpaa.

Innuttaasummi immikkut nakkutigisariallit isumagisariallillu Kalaallit Nunaanni inissiisarfinnut assingunngitsuni inissiisarfinniitinneqarneranni Danmarkip nunarput ikiortariaqaraa taanna isumaqarpoq.

Pineqaatissinneqarsimasulli paarineqarneranni akiligassaq kommunenit akilerneqarani Namminersorlutik Oqartussanit nalaagaffimmiillu akilerneqartariaqarpoq.

Aamma atuarukNaalagaaffeqatigiit kinguarsimasunut pinerluuteqarsimasunut tunngatillugu akiligassat avittariaqaraat

- Imaanngilaq Kommuneqarfik Sermersooq imaluunniit Namminersorlutik Oqartussat suliami assuarigikka. Inuttaasulliuna nunat marluk akornanniitinneqarneranni kommunet sorliit akiliisussaanersut iliuuseqartussaanersullu pillugu isumaqatigiissut pineqartoq, Holger Schou Rasmussen oqarpoq.

Aalajangiussaq Lolland Kommunep eqqartuussiviit qullersaannut ingerlateqqinniarlugu maanna qinnuteqarniarpoq. Suliap ilumut ingerlateqqinneqarsinnaaneranik aalajangernissaq ukiup ataatsip missaanik sivisutigisinnaavoq.

Holger Schou Rasmussenillu utaqqinermini danskit naalakkersuisui suliami pineqartumi inatsimmik allanngueqqullugit kimigiiserfiginiarpai.

- Allannguisoqartariaqarpoq, Danmarkimilu ministerit akisussaasut attavigissavakka, taanna oqarpoq.

Suliaq ´tunngaviusumik pingaarutilerujussuanngorsinnaasoq pisarioqisorlu´ aamma danskit kommuniinut tamanut sunniutilerujussuanngorsinnaasoq Randers Kommunemi borgmesteri Torben Hansen (S) oqarpoq.

- Aalajangiussami tunngavigineqartut atuaqqaarusuppakka, tunngavilersuutigineqartullu kommunit kattuffiat, Kommunernes Landsforening, peqatigalugu oqallisigerusuppakka, Torben Hansen sapaatit-akunnerata siuliani aalajangiinerup kinguninngua KNR-imut allappoq.

Suliaq naammassivitsinnagu suliaq pillugu Kommuneqarfik Sermersuup oqaaseqarnissani kissaatiginngilaa.