Lolland eqqartuussiviit qullersaannut ingerlatitseqqittoq: Kalaallit paarineqarnerannik akiliinissarput naapertuutinngilaq
- Aalajangiineq ingerlateqqissavarput.
Vestre Landsretip akiliisussanngortitsilluni aalajangiinera pillugu Danmarkimi Lolland Kommunemi borgmesteri Holger Schou Rasmussen (S) taama erseqqitsigisumik nalunaaruteqarpoq.
Angutip kalaallip eqqarsartaatsimigut innarluutillip pineqaatissinneqareernermi kingorna saassussisimasup paarineqarnerani Lolland Kommunep akiliisussanngortinneqarnera taassuma akueriumanngilaa.
Saassussineq pivoq Lollandimi inissiisarfimmi matoqqasumi Kofoedsmindemi, angutip kalaalip kommunerisamini Kommuneqarfik Sermersuumi pinerlussimanini pineqaatissiissutigalugu tassani inissiisarfimmiitsinneqarnerani.
- Ilumoorsinnaanngilaq innuttaasup inissiisarfimmiitinneqarnermini pinerloqqinnerani Kalaallit Nunaata akisussaaffimminik qimarratiginninnissaa oqarlunilu: ´Uagut taanna innuttaasoriunnaareerparput, pissutigalugu innuttaasoq Sermersuup inissiisarfimmiititaa Danmarkimi inissiisarfimmiinnermini pinerlummat´, Holger Schou Rasmussen oqarpoq.
Borgmesteri: Akiligassaq Namminersorlutik Oqartussat naalagaaffiullu avillugu akilertariaqarpaat
Suliami aningaasartuutit saniatigut Lolland Kommune 2,4 millionit koruuninik Kommuneqarfik Sermersuumut akiliisassoq Vestre Landretip aalajangerpaa.
Randers Kommunep Kommuneqarfik Sermersuullu akornanni suliaq assingusoq aamma pineqarpoq. Tassani Randers Kommune 2,7 millionit koruuninik Sermersuumut akiliisussanngortinneqarpoq.
Suliarli aalassatitsisoq Kalaallit Nunaata pisuussutiginngikkaa Holger Schou Rasmussenip erseqqissarpaa.
Innuttaasummi immikkut nakkutigisariallit isumagisariallillu Kalaallit Nunaanni inissiisarfinnut assingunngitsuni inissiisarfinniitinneqarneranni Danmarkip nunarput ikiortariaqaraa taanna isumaqarpoq.
Pineqaatissinneqarsimasulli paarineqarneranni akiligassaq kommunenit akilerneqarani Namminersorlutik Oqartussanit nalaagaffimmiillu akilerneqartariaqarpoq.
- Imaanngilaq Kommuneqarfik Sermersooq imaluunniit Namminersorlutik Oqartussat suliami assuarigikka. Inuttaasulliuna nunat marluk akornanniitinneqarneranni kommunet sorliit akiliisussaanersut iliuuseqartussaanersullu pillugu isumaqatigiissut pineqartoq, Holger Schou Rasmussen oqarpoq.
Aalajangiussaq Lolland Kommunep eqqartuussiviit qullersaannut ingerlateqqinniarlugu maanna qinnuteqarniarpoq. Suliap ilumut ingerlateqqinneqarsinnaaneranik aalajangernissaq ukiup ataatsip missaanik sivisutigisinnaavoq.
Holger Schou Rasmussenillu utaqqinermini danskit naalakkersuisui suliami pineqartumi inatsimmik allanngueqqullugit kimigiiserfiginiarpai.
- Allannguisoqartariaqarpoq, Danmarkimilu ministerit akisussaasut attavigissavakka, taanna oqarpoq.
Suliaq ´tunngaviusumik pingaarutilerujussuanngorsinnaasoq pisarioqisorlu´ aamma danskit kommuniinut tamanut sunniutilerujussuanngorsinnaasoq Randers Kommunemi borgmesteri Torben Hansen (S) oqarpoq.
- Aalajangiussami tunngavigineqartut atuaqqaarusuppakka, tunngavilersuutigineqartullu kommunit kattuffiat, Kommunernes Landsforening, peqatigalugu oqallisigerusuppakka, Torben Hansen sapaatit-akunnerata siuliani aalajangiinerup kinguninngua KNR-imut allappoq.
Suliaq naammassivitsinnagu suliaq pillugu Kommuneqarfik Sermersuup oqaaseqarnissani kissaatiginngilaa.