Kalaallit Nunaata allanik oqartussaaffigineqalinnginnissaanik allagartap qulakkeerpaa
Danmarkip 1916-imi qeqertat De Vestindiske Øer 25 millioner dollarsilerlugit tunigamigit ilanngullugu isumannaarpaa amerikamiut siunissami Danmarkip kissaatigisaa malillugu Kalaallit Nunaata allanik oqartussaaffigineqalinnginnissaanik tapersersortuarnissaa. TV2 taama allappoq.
Taamanikkut Danmark Norgelu Kalaallit Nunaata ilaanik piginnittoorusullutik ilungersuuteqarput. Norgemiut Tunumi nunasiortorput, danskit kitaani sanaartortalereersimasut.
Danmarkilli qeqertat 1916-imi tunigamigit iluanaaruteqarpoq.
Tunisinerminnimi danskit amerikamiut pappialannguamut atsiortippaat neriorsuitillugit apeqqutini Kalaallit Nunaannut tunngassuteqartuni Danmark tapersersortuarumallugu.
Naalagaaffiup allagaataasivianiittumiippoq isumaqatigiissut atsiugaq, tassanilu amerikamiut danskinut neriorsuutaat atuarneqarsinnaavoq.
- Lansingip ataqqinaatitut nalunaarutigaa, amerikami naalakkersuisut danskit naalakkersuisuinut akerlilersuissanngitsut taakku kissaatigippassuk Kalaallit Nunaanni tamarmi politikkikkut aningaasarsiornikkullu soqutigisatik annertuserusuppatigit. Isumaqatigiissummut oqaluttuarisaanermi pingaaruteqartumut ilanngussami oqaaseqatigiit taama nipaqarput.
Amerikamiut nunanut allanut tunngasunut ministeriata Robert Lansingip allakkat 1916-imi New Yorkimi atsiorsimavai.
Danmarkip Landsrådillu kingorna norgemiut nunat assigiinngitsut akornanni eqqartuussivimmut Haagimiittumut sassaqquai, Tunulu pillugu aaqqiagiinnginnerit Danmarkimut iluaqutissatut 1933-imi aalajagiiffigineqarput. Tamannalu pisinnaasimavoq amerikamiut Danmark tapersersormassuk.
- Taamaattuminguna Kalaallit Nunaat ullumikkut Naalagaaffeqatigiinnut ilaasoq, Naalagaaffiup allagaataasiviani ilisimatusarluarsimasoq Erik Gøbel TV2-mut oqarpoq.