Kulturi

Kalaallit Nunaat Tivolimi ukiunik 40-nngortorsiussaaq

Nunatta avataani nunarput pillugu kulturikkut aaqqissuussinerit anginersaat, Kalaallit Nunaat Tivolimi, ukioq manna akunnaatsuliilluni nalliuttorsiussaaq, pisanertullu juulip 31-anit aggustip aallaqqaataa ilanngullugu ingerlanneqassalluni.

Allattoq Simon Uldum -

juunip 29-at 2016 06:51

Kalaallit Nunaat Tivolimi nunatta avataani - ilami nunarsuarmi tamarmi - kalaallit kulturikkut aaqqissuussinerisa anginersaraat. Kalaallillu Danmarkimi ilinniagaqartut Tivolimi naapisimaartalernerannit ukioq manna ukiut 40-nngorput, ileqqoq ukiut ingerlanerini alliartuinnarsimasoq.

Aamma atuaruk ASSIT Kalaallit Nunaat Tivolimi iluatsilluartoq

Nipilersortussarpassuit

Kalaallit Nunaat Tivolimi 1976-imi pileqqaartoq "utoqqarmut mamarsigaluttuinnarpasippoq". Ukioq mannami nipilersortussat nunatsinni nunanilu tamalaani nuannarineqarluartut assigiinngitsunik nipilersoriaasillit tusarnaartitsissapput, tassaallutik:

Ole Kristiansen, Nive Nielsen And The Deer Children, Inuk, Rockstones, Da Bartali Crew, Takuss Band, Josef Josefsen & Ida Heinrich, Takuss Band, Ilang, Uummannaq Børnehjem, Aavaat kiisalu Atsinnermiut.

Kalaallit Nunaat Tivolimi ukiunik 40-nngortorsiornerata saniatigut aamma erinarsoqatigiit Aavaat ukiunik 20-nngortorsiorput Ole Kristiansenillu saqqummersitaata nuannarineqartupilussuup "Pop Uummataaruffimmi" saqqummerneranit ukiut 25-nngorlutik.

Tuniniaaviit sulliviillu

Kalaallit Nunaat Tivolimi nipilersornerinnarmik sammisaqarfiunngilaq, ukiummi siuliinisulli aamma tuniniaaveqarlunilu sulliveqassaaq:

Akikik – sanaalukkat
Isaksen Design – kalaallit ilusilersugaat
Kristian Fly – sanaalukkat pinnersaatillu
Greenland Food – aalisakkat qaleruallillu
Alutorn – sanaalukkat
Ellen Svendsen – sanaalukkat
Great Greenland – puisip amianik atisaliat
Milik Publishing – atuakkat
Arctic Ice Cap Water – imeq sermersuarmeersoq
Arctic Keramik – marriat nunatsinneersut
Tranhuset – kalaallit tunisassiaat
Bibi Chemnitz – kalaallit atisaliaat mutit
Karo Street og Ajaplu Design – eqqumiitsuliat sanaalukkallu
Rasmussen Kielseneeraq / NAN1..NAN2..NAN62 - titartakkat qalipakkallu

Kalaallit Nunaat Tivolimi aqutsisooqatigiit aaqqissuussinermut pilersaarut ungasinngitsukkut nalunaarutigissamaarpaat oqaatigisinnaavaalli Ole Kristiansen aggustip aallaqqaataani kingullersaalluni tusarnaartitsisuussasoq.