Kalaallit Nunaat Tivolimi: Nunaqqatit takoqqillugit nuanneqaaq
Coronavirusip peqqutaalluni tunillaassuunnera ukiuni marlunni Kalaallit Nunaanni Tivolertoqanngereersorlu ippassaq sapaammi ammaqqippoq.
Seqinnarippoq, Tivolillu nipilersortartui appisimaarput. Takummaasorpassuuppullu.
- Nunaqqatit sivisuumik takunngisat takoqqillugit nuanneqaaq. Takummaalluni nuanneqaaq, Danmarkimi maanna najugalik Bikki Reimer oqarpoq.
Taanna qalipakkaminik tuniniaavoq, taassumalu qalipagaata ilagaat Sassuma Arnaa.
Assiliisoq: Arnaq Nielsen, KNR
- Ulloq nuannivippoq. Sassuma Arnaata oqaluttuassartaanik ilisimanninngitsunut oqaluttuarisarpara. Tassa immamik mingutsitsineq immap uumasuinut qanoq sunniuteqartarnersoq oqaluttuarisarpara. Uumasullu annaanniarlugit Sassuma Arnaata illaartariaqartartoq aamma oqaluttuarisarpara. Sassuma Arnaata oqaluttuassartaa inunnit nuannarineqartaqaaq, oqaluttuarissallugulu nuannarisaqaara, Bikki Reimer KNR-imut oqarpoq.
Kalaallit Nunaat Tivolimi 2022-mi appittussat
- Aqqa Band
- Aavaat
- Poulsen Band
- G-60
- Pele Møller Band
- Zikaza
Siornaak taamaatinneqartoq siornalu allatut aaqqissuunneqartoq
Næstvedip eqqaani najugalik, Ole Johansen, Aasianneersuuvoq. Taanna nunatsinniit ukiorpaaluit matuma siornatigut, tassa aqqanilinnk ukioqarluni, Danmarkimut nuuppoq.
Taannalu kalaallisut erinarsortunik Danmarkimi tusarnaarpiartanngilaq. Taamaammat erinarsoqatigiit Aavaat erinarsormata alutorsaqaaq.
- Nuannertorujuuvoq tusarnaarlugit, maqaasillugit tamakkua nipinnguit. Kalaallisut erinarsortut nuanneqaat, erinarsoqataassuunga, Ole Johansen qungujulaqaluni oqarpoq.
AAMMA ATUARUK Kalaallit Tivolimi aggustip aallaqqaataani naapeqqittussanngorput: Qilanaarpugut
2020-mi 46-ssaannik Kalaallit Nunaat Tivolernissaagaluaq aaqqissuisunit coronavirusip tunillaassuunnera peqqutaalluni taamaatinneqarpoq.
Coronavirusilu 2021-mi suli tunillaassuummat, taamanikkut aamma allatut aaqqissuussisoqarpoq.
Siornatigutulli ukioq manna ulluni marlunni aaqqissuussisoqarnerani ullumi ataasinngornermi qilaatersortoqaqqissallunilu uaajeertoqaqqissaaq.
Erinarsoqatigiit Aavaat aamma erinasoqqissapput, nipilersoqatigiillu Pele Møller Bandikkut appisimaaqqissallutik. Aaqqissuussineq unnugu naggaserneqarpat, nipilersoqatigiit Zikazakkut appissapput.