Ataatsimoortumik tapiissuteqartarneq ingerlaannassaaq
Kalaallit Nunaat namminiilivikkaluarluni Danmarkimit ataatsimoortumik tapiissutinik pisartagaqaannarsinnaasariaqarpoq. Alternativetip Kalaallit Nunaannut tunngasunut oqaaseqartartua taama oqarpoq.
Kalaallit Nunaata nunasiaataasimanerata kingunerisai Danmarkip akisussaaffigisariaqarpai - aamma Kalaallit Nunaata namminerisaminik tunngaviusunik inatsiseqalernerata kingorna, partiip Alternativetip Kalaallit Nunaannut tunngasunut oqaaseqartartua Roger Mathiasen taama isumaqarpoq.
- Nunamik allamik nunasiaateqaleraanni, taava - uanga isumaga malillugu - A-mik oqarsimagaanni aamma B-mik oqarsinnaasariaqarpoq. Ima paasillugu, nuna taanna nunanut atugartuunut allanut naligiissinnissaanut ikiorneqartariaqarpoq.
Taamaammat nunasiaataasinermut taarsiissutitut Danmarkip Kalaallit Nunaat aningaasatigut tapersersuinnartariaqarpaa.
- Reperationsimik taaneqartartumut assinguvoq, tassalu nunap nunasiaatigineqarnerani ajoqusiisimanermut taarsiissutitut ittumik akiliuteqarneq. Tamannalu Kalaallit Nunaannuinnaq atuutinngilaq, Danmarkip Dansk Vestindienip nunasiaatigisimaneranut inussiaateqarsimaneranullu tunngatillugu iliuuserineqarsimasunut aamma atuuppoq.
Isumalioqatigiissitamut inatsisinik tunngaviusunik suliaqartussamut atatillugu Danmarkimit ataatsimoortumik tapiissutit pillugit apeqqut Naalakkersuisut isummerfigiumanngilaat.
Alternativetimili, aningaasarsiornermut politikkimik tamakkiisumik peqannginnini pillugu siornatigut isornartorsiorneqarsimasumi, aningaasaqarneq pinngikkaluarlugu anguniakkat aamma inissaqartinneqartariaqarput, Roger Mathiasen taama isumaqarpoq.
- Anguniagaqarnitsinni aningaasaqarneq eqqarsaatiginagu inuiaqatigiit qanoq ittut silarsuarlu qanoq ittoq pilersikkusunnerlutigit eqqarsaatigisarparput. Folketingillu ataatsimiittarfissuanut iseraangatta taava aningaasalersornissaanut pilersaarummik nassataqartarpugut. Taamaaliornissamullu kiffaanngissuseqarneq, isumaqarpunga Kalaallit Nunaata inatsisinik tunngaviusunik suliaqarnermini atortariaqarpaa.
