Ataatsimoortumik tapiissutit atorunnaarnissaannut ulluliinissaq SF-ip piumasarigaa

Inuit Ataqatigiit Danmarkimi suleqataata SF-ip kalaallit nammineq tunngaviusumik inatsiseqalernissaat tapersersorluinnarpaat.

Kalaallit Nunaat pillugu oqaaseqartartuat Karsten Hønge taama oqarpoq:

- Nammineq nunagisamut misigisimagaanni nammineq tunngaviusumik inatsiseqalernikkut inunneq nammineq aqulluarsinnaanerullugu, taava isumaqarpunga maanngaanniit tapersersorneqartariaqartoq.

Taassuma siunissami kalaallit namminneq tunngavisumik inatsiseqalernissaat takorloorsinnaavaa - aamma danskit tunngaviusumik inatsisaata avataatigut - ilutigitillugulu Danmark suli ukiumoortunik tapiissutinik akilersuisoq.

- Imaappoq takorloorsinnaaqaara Kalaallit Nunaata namminiilivinnissaanut annertunerusumut tapersersuinissaq, siunissamilu tapersersorneqarluni namminersulivilluni. Pissutigalugu oqaluttuarisaanermi ataatsimoorussaqarsimagatta, immitsinnullu amerlasuutigut attuumassuteqarluta.

Kisianni Danmarkip qanoq sivisutigisumik akilersuinissaata killissaata ullulerneqarnissaa pisariaqarpoq:

- Isumaqarpunga eqqoqqissaartunik isumaqatigiissusiussasugut, arlaatigullu ullumik atorunnaarfissamik killiffiliilluta. Imaappoq Kalaallit Nunaat kissaateqarpat namminersortuujumalluni pituttorsimananilu, taava kiffaanngissuseqarusuvissut aningaasatigut aamma kiffaanngissuseqarusussasut.

Demokratinut akissummini aningaasanut naalakkersuisup Aqqaluaq Biilmann Egedep innersuussutigaa Namminersorneq pillugu isumalioqatigiissitap isumaliutissiissutaa 2008-meersoq.

Tassani allassimavoq apeqqutit naalagaaffiup innuttanut pisussaaffiisa avataaniittut - soorlu aningaasatigut tapiissutit - qanorluunniit Danmarkip Kalaallit Nunaatalu akornanni isumaqatigiinniutigineqarsinnaasut.

Naalagaaffiulli tapiissutaasa killissai ullulerneqanngippata Kalaallit Nunaat pituttorsimanngitsutut imminut taasinnaanngilaq.

- Allanik isumalluuteqarunnaanerarneq namminersortunngornerarnerlu aatsaat isumaqalissapput ulloq taanna ilumut taama ittunnguikkaanni. Tassalu pappialaannaassanngilaq takutitassaq oqarluni: "Takusiuk, namminersorpugut!" Kisianni aamma aningaasaqarluarnikkut, politikkikkut, ilinniartitaanikkut kulturikkullu aammalu allatigut namminersortuuneq, allanik isumalluuteqanngitsuuneq
kiffaanngissuseqartuunermullu ilumut piviusunngortinneqartariasqarput.

Kalaallit tunngaviusumik inatsisissaat danskit tunngaviusumik inatsisaat qaangerlugu imaqassasoq siunertaavoq.
Tunngaviusumilli inatsit Nunarput Danmarkimiit avissaarpat aatsaat atuutilissaaq, avissaarnisssamullu ukiorpassuit ingerlaqqaarsinaapput.

Taamaakkaluartoq, nunarput nammineq tunngaviusumik inatsiseqalissappat, Danmark ataatsimoortumik tapiissuteqartaannassasoq Karsten Hønge-p takorloorpaa.