Kalaallit Nunaat Kinami

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq Kinamut oktobarip ulluisa 24-anniit oktobarip 31-ata tungaanut angalassaaq.

Angalaneq Yakeshimi Bosch Winter Test Centerimut, Arjeplog Test Managementimit (ATM) Sverigep avannaaneersumit ingerlanneqartumut, pulaarnermik aallarnerneqassaaq. ATM Kangerlussuarmi ingerlatsivissamik pilersitsinissamut periarfissanik misissuivoq.

Angalaneq Beijingimut ingerlaqqissaaq, tassani Kopenhagen Fur Designstudiomi Kinamiunut amminik pisisartunut arlalinnut Great Greenlandip kingullermik ammit atorlugit atisaliaasa saqqummiunneqarnissaat aaqqissuunneqarluni. Amminik tuniniaanermut Kinamiut niuerfii annertoorujussuupput, taamaattumik siunissami, minnerunngitsumik Kinamiut ilusilersuisartut inuusuttut atugassaannik puisit amiinik, tunisisarnissamut niuerfiit pingaaruteqartussaallutik.

Danskit Beijingimi aallartitaqarfiannni Kalaallit Nunaata ullua angalanermi ilaatinneqarpoq, tassani Kinamiunit inuussutissarsiortunit aallartitat, Kinamiut aviisiliortut arlalippassuit peqatigalugit peqataassallutik. Kalaallit Nunaata ulluani ilaatigut Kalaallit Nunaat nunatut takornariarfissatut Kinamiunut angalatitsisarnermik suliaqartunut, Kalaallit Nunaanni erngup nukingata iluani periarfissaqarfiusut, avammut tuniniagassatut sermimik imermillu tunisassiornissamut periarfissat, saqqummiunneqassapput, Great Greenlandip ammit atorlugit atisaliai nutaanerpaat il.il. saqqummiunneqassallutik.

Vittus Qujaukitsoq aamma suliffeqarfinnik namminersortunik, aningaaserivinnik aningaasaliisartunik aamma issittoq pillugu ilisimatusarfinnik ataatsimeeqateqassaaq.