Kalaallit Nunaat EU-mik suleqateqarneruleriaannaavoq

Naalakkersuisut Siulittaasuata Kuupik Kleistip Kalaallit Nunaata soqutigisai EU-mi suliaqartunut Bruxelles-imi ulluni kingullerni marlunni saqqummiuppai.

EU-mi inatsisartuni ilaasortanik arlaqartunik ataatsimeeqateqarpoq, amerlanerusunik aningaasaliisoqartariaqarnera erseqqissarneqarluni, Naalakkersuisut siulittaasoqarfianit tusagassiuutinut nalunaarummi ilaatigut allassimavoq.

Aatsitassat nunap saneqaataanik immikkuullarissunik akullit, aamma aatsitassanik qaqutigoortunik taaneqartartut, ilaatigut EU-mit soqutigineqarput.

Naalakkersuisut siulittaasuat Bruxelles-miinnermini ataatsimeeqatigai Ineriartortitsinermut Kommissæri Andris Piebalgs, Inuussutissarsiornermut inerisaanermullu Kommissæri Antonio Tajani aamma Silap pissusaanut tunngasunut  Kommissæri Connie Hedegård.

Kalaallit Nunaat EU-imi ilaasortanngikkaluartoq, EU-mik suleqatigiinnermik  isumaqatigiisutaareersut ingerlatiinnarneqarnissaanut periarfissaqartoq, Naalakkersuisut siulittaasuata oqaatigaa, taakkualu nutarterneqarsinnaasut oqaatigineqarluni.

Tamanna pissutigalugu Kuupik Kleistip  EU-mi  Inuussutissarsiornermut inerisaanermullu
Kommissæri Tajani nunatsinnut tikeraarsarpaa, nunatsinni aatsitassarsiornerup ineriartortinniarnerani unammilligassat suunersut, soorlu aatsitassat qaqutigoortut pillugit misissuinermut tunngasut, nammineq takusinnaaniassammagit, Naalakkersuisut siulittaasoqarfiat nalunaarpoq.