Kalaallit Nunaannut suleqateqartuarumavugut
Silap pissusaa pillugu ministeri, Martin Lidegaard Nuummi Debatten-imi ippassaq peqataasoq isumaqanngilaq, qallunaat politikkerii sinnussimasut – taamaattoq suliniuteqarnissamut atatillugu Kalaallit Nunaat utaqqimaarneqarsimasoq. Siunissamullu Qallunaat Nunaat Kalaallit Nunaannut suleqatissatut inissisimassasoq unnerlugu.
-Ataqqeqatigiinnani naalagaaffeqatigiittoqarsinnaanngilaq, Kalaallit Nunaatalu siunissami aningaasatigut eqqanaarneqarnissaanut isumannaareqataarusuppugut. Inuussutissarsiutit assigiinngitsut pillugit suleqatigiissutaasinnaapput, soorluttaaq aatsitassarsiulersinnaanermut tunngasut, Martin Lidegaard oqarpoq.
Pisortat namminersortullu suleqatigiissinnaanerannut soorlu DONGimut ukiorpassuarni uuliasiornermut atatillugu misilittagaqarsimasumut assigusumik, Lidegaard siuttuulluni suliniuteqartuuvoq. Naalagaaffeqatigiinnermilu sinaakkusiisumik ataatsimuussuseqarlunilu tamatumunnga suleqatiserinnippoq.
- Kalaallit Nunaata Namminersorneq pillugu isumaqatigiissut naapertorlugu suliassaqarfinnik tigusiartuaarnermigut namminiileriartussaaq, suliassaqarfinnillu assigiinngitsunik tigooraanermi qanimut suleqataarusuppugut, tamanna kalaallinit kissaatigineqarpat, Martin Lidegaard neriorsuilluni oqarpoq.
