Trumpip Kalaallit Nunaannut aaqqissuussaanikkut soqutiginninnini ilalerpaa
USA-mi præsident, Donald Trump, sapaammi nassuerpoq, Kalaallit Nunaat “aaqqissuussaanikkut” soqutigalugu.
Taama allappoq nutaarsiassaqartitsivik Reuters.
- Eqqartornikuuarput. Danmarkimi piginnittuusutut oqaatigineqarsinnaavoq. Danmark suleqatigaarput, Danmarkilu illersortarparput, taamammat isuma taanna eqqartorneqarpoq, aaqqissuussaanikkullu soqutiginartoqarteqaara, præsidenti oqarpoq.
Præsidentip aningaasaqarnikkut siunnersortaata Larry Kudlow-ip Trump aallaffeqarfiani Nunarsuarmi qeqertat annersaat pisiarinialikkersaarneraanerata kingorna nalunaarut takkuppoq.
Kudlow oqarsimavoq Kalaallit Nunaat aatsitassaqarluarmat aaqqissuussaanikkullu pingaaruteqarmat præsident-ip pisiarerusussimagaa.
"Danmarkimut ilungersunartoq"
Amerikarmiulli præsidentiata sapaammi nassuerutigaa Kalaallit Nunaat soqutigalugu, pisiarseriniarnissaali pilersaarutini pingaarnersaniinngitsoq naqissuserpaa.
- Periarfissat amerlaqaat. Suut tamarmik nioqqutissaapput Nunarsuatsinni. Danmarkimut ilungersunarpoq ukiumummi 700 million koruunit Kalaallit Nunaannut annaasarpaat, sapaammi præsidenti tusagassiortunut taama oqarpoq.
AAMMA ATUARUK Uppernarsarneqartoq: Trump nunatta pisiarinissaa pillugu misissuivoq
Danskit Ministeriunerat Mette Frederiksen (S) sapaammi Kalaallit Nunaannut tikeraarpoq. Tikeraarnermini naqissusiivoq Kalaallit Nunaat tuniniagaanngitsoq.
- Kalaallit Nunaat tuniniagaanngilaq. Kalaallit Nunaat qallunaajunngilaq. Kalaallit Nunaat kalaaliuvoq. Neriuppunga amerikarmiut soqutiginninnertik attatissanngikkaat pimoorutissanngikkaallu, Mette Frederiksen oqarpoq.
Danmarkimut tikinnissaq qularnartoq
2.-3. september Donald Trump pilersaarpoq Danmarkimiissalluni, tassani ilaatigut Mette Frederiksen Issittoq pillugu naapittussaallugu. Aammattaaq tikeraarnermini Naalakkersuisut siulittaasuat, Kim Kielsen naapittussaavaa.
Kim Kielsen Mette Frederiksen-ituulli Kalaallit Nunaat tuniniagaannginnerarpaa.
Sapaat unnukkaa Trumpip Danmarkimut tikeraarnissani qularnartoqartinnerarpaa.
- Aaliangivissoqqanngilaq ilumut tikissanersunga. Immaqa. Polen-iliariarluta imaassinnaavoq Danmarkiliartugut, Donald Trump tusagassiortut katerinnerini oqarpoq.