Uppernarsarneqartoq: Trump nunatta pisiarinissaa pillugu misissuivoq
Eqqorpoq. USA-p præsidentia Donald Trump nunatta pisiarinissaa pillugu misissuivoq.
Tamanna præsidentip illorsuani aningaasaqarnermut tunngasunut siunnersortip Larry Kudlowip uppernarsarpaa. Taanna naapertorlugu Trumpip naalakkersuisuisa pisisinnaaneq maanna misissorpaat.
Kudlow amerikamiut nittartagaannut Fox News Sundayimi The Hillimut taama oqarpoq.
- Danmarkip Kalaallit Nunaat pigivaa. Danmarki iligisarivarput. Kalaallit Nunaata inissisimanera pilersaarusiornermut tunngatillugu pingaaruteqarpoq. Nalituunik aatsitassaqarpoq.
- Præsidentip illunik pigisanillu allanik pisinermik ilisimasaqarluartup misissorusuppaa, The Hill naapertorlugu Kudlow Foximi ingerlatsisumut Dana Perinomut oqarpoq.
Trumpip nunatsinnik pisinissaminik eqqarsaatersorsimasoq sapaatit akunnerata matuma ingerlanerani saqqummerpoq. The Wall Street Journalip kinaassutsiminik isertuussisunik apersuinerit aallaavigalugit allaaserisaani tamanna saqqummeqqaarpoq. Allaaserineqartorli eqqorpoq.
Nunatsinni Danmarkimilu politikerit nunatta Danmarkimit USA-mut tuniniarneqarnavianngitsoq oqaatigisareerpaat. Tamatumali Trump septembarip aallartinnerani Danmarkimukarpat oqallisigineqarnissaa maanna naatsorsuutigineqartariaqarpoq.
Ministeriuneq Mette Frederiksen Nuummut ullumi tikippoq. Præsidentillu eqqarsaatersornera pillugu Sermitsiaq.AG-mut itigartitsivoq.
- Kalaallit Nunaat tuniniarneqanngilaq. Kalaallit Nunaat danskinit pigineqanngilaq. Kalaallit Nunaat kalaallinit pigineqarpoq. Neriuppunga pimoorussilluni oqaatigineqanngitsoq, Mette Frederiksen nittartakkamut oqarpoq.
/ritzau/