Nunatsinni Taekwon-Do-mik ukiorpassuarni unammisartoq toqukkut qimaguppoq
Nunatsinni Taekwon-Dop silarsuaani annertuumik annaasaqarpoq.
Christian Isaksen, 1987-imi kalaallit angutit holdianni unammeqataalluni kalaallit nunarsuarmi pissartanngoqqaarmata ajugaaqataasimasoq, toqukkut qimaguppoq. Kalaallit Nunaani Taekwon-Dotartut Kattuffiat taama nalunaarpoq.
- Christiaat Taekwon-Domi ukiorpassuarni sungiusaasuusimavoq Nunatsinnilu unammersuarnerni aqutsisuusarsimalluni. 1979-imi Taekwon-dortartunngornerminiit nunatsinni Taekwon-Dop timersuutigineqalerneraniit pimoorussilluni peqataasimavoq. Nunatsinni Taekwon-Dop silarsuaani annaasaq angeqaaq, Kalaallit Nunaanni Taekwon-Dotartut Kattuffiani siulittaasoq, Vivi G. Lennert oqarpoq.
Christian Isaksen oktoobarip 21-ani 2016-imi 7. dan-imik qernertumik qitequteqalerpoq. Ukiorpassuarni nunarput sinnerlugu unammisartuunermini, nunarsuaq tamakkerlugu unammersuarnerni arlaleriarluni pissartaasarsimalluni.
Nunarsuaq tamakkerlugu unammersuarnermi, holdtul-imi 1987-imi Grækenlandimi Athenimi ingerlanneqartumi, kalaallit angutit holdianni unammeqataalluni kalaallit nunarsuarmi pissartanngoqqaarmata ajugaaqataasimammat. Taamani ajugaangamik nunatsinni timersortartuni Taekwon-dortartut siullersaallutik, nunarsuaq tamakkerlugu unamminerni nunatsinnit peqataaffigineqartunit pissartanngoqqaarput, Kalaallit Nunaanni Taekwon-Dotartut Kattuffiani allapput.
Christiaap nuliani Trine qitornatillu pingasut qimappai, massakkut nuliaminik qitornani ilanngullugit qulinik inersimasunngortunik qitornaqarpoq, taakkulu aamma toqukkut peerunnermigut qimappai.
Kalaallit Nunaani Taekwon-Dotartut Katuffianniit Christiaap siusippallaamik qimagunnera tupassutigaarput aliasuutigalugulu.
