Kalaallit Nunaanni Politiit: Sisimiuni aserorterinerit amerliartortut

Sisimiuni meeqqerivik, meeraaqqerivik politeeqarfillu piffissami kingullermi aserorteriffigineqarput. Tamanna pakatsinartoq, politiit oqarput.
- Paaqqinniffinnut, politiit biiliinut ilagaanillu aserorterneqarsimasut ullaarnganiit nalunaarutigineqarnerat pakatsinarpoq. Suliffimmut malunniutaapput aamma piffissamik suliassaniillu pingaarnerusunit isumalluutaasut atorneqarput. Assi © : Rigspolitiet
septembarip 18-at 2020 10:52
Nutserisoq Connie Fontain

- Kalaallit Nunaanni Politiit Sisimiuni sulisui sisamanngornermi ullaakkut suliartoramik sapaatit-akunnerisa marluk ingerlaneranni aappassaanik aserorteriffigineqarsimasoq paasivaat. Tamatumuuna poliitit biilii pingasut politeeqarfiullu illutaasa igalaavi aserorteriffigineqarsimapput.

Kalaallit Nunaanni Politiit tusagassiuutinut nalunaarummi allapput.

Sisimiuni politeeqarfiup illutaa biiliilu marluk tallimanngormat kingullermik aamma aserorteriffigineqarput. Sapaatillu akunnerani matumani aamma taama pisoqaqqilluni.

AAMMA ATUARUK Sisimiuni politeeqarfik aserorteriffiusoq: Takunnissimasussarsiortut

Politiillu kisimik aserorteriffigineqanngillat.

- Meeqqeriviup meeraaqqeriviullu igalaavi unnuaq taanna aamma aserorterneqarput. Sisimiuni politiit Meeqqerivik Nuniaffiup, Naja/Aleqap politeeqarfiullu eqqaani inunnik ippassaq ualikkut tallimat septembarillu 17-iani sisamanngornermi ullaakkut arfernup akornanni takunnissimasussarsiorput, politiit allapput.

Isumalluutit suliassanik pingaarnerusuneersut atorneqartut

Sisimiuni politiit aserorterisoqarnera pakatsissutigaat, pisunilu takunnissimasunik suli amigaateqarlutik.

- Paaqqinniffinnut, politiit biiliinut ilagaanillu aserorterneqarsimasut ullaarnganiit nalunaarutigineqarnerat pakatsinarpoq. Suliffimmut malunniutaapput aamma piffissamik suliassaniillu pingaarnerusunit isumalluutaasut atorneqarput.

- Aamma soorunami eqqarsaatersortitsingaatsiarput. KIkkut tamaaliorpat? Kina nalinginnaasumik meeraqarfiusumi igalaanik aserorteriva?, Sisimiuni politiit pisortaat, Karl Jørgen Lennert oqarpoq.

Taamaammat Sisimiuni politeeqarfik videomik nakkutilliisoqalerpoq.

Nunatsinni aserorterinerit

Sisimiuni kisimi aserorterisaoqanngilaq. Politiit oqarnerat naapertorlugu nunatsinni aserorterinerit amerliartorput. Politiit pisortat inuinnaallu pigisaani igalaat aserorneqarsimasut biilillu aserorteriffigineqarsimasut pillugit qassiiusunit nalunaaruteqarfigineqarput.

Qaqortumi politiit biilii qanittumi aamma aserorteriffigineqarput.

- Nunarput tamakkerlugu aserorterinerit pakatsinartut uatsinnut aamma eqquisut amerliartorpasittut takusinnaavarput. Politiit sulinerat akornuserneqartarpoq, tamannalu politiit innuttaasunut ikiuiartorniarlutik kingusinnerusumi takkunnerannik kinguneqartitsisinnaavoq.

- Innuttaasut maluginiaaqatigissagaatigut aserorterisunillu takussagunik nalunaaruteqarnissaat kaammattuutigaarput, politimesteri, Bjørn Tegner Bay oqarpoq.

Kalaallit Nunaanni politiit aserorterisoqarneranut takunnissimasinnaasunit oqarasuaammut 701322-mut imaluunniit 701448-mut attavigineqarusupput.