Kalaallit Nunaanni arnat qinersisinnaalerneranniit ullumi ukiut 65-it qaangiupput

Danmarkimi arnat ukiut 100-t sinnerlugit qinersisinnaatitaanikuupput, Nunatsinnili aatsaat arnat 1948-mi qinersisinnaatitaalerlutik. Taamanimiilli arnat atugaat pitsanngoriartorsimapput, sumiiffiilli ilaanni suli naligiissitaaneq suli annikippallaarpoq. Soorlu Nunatsinni kommunet avannarpasinnersaannit sinniisut qinikkat marluk taamaallaat arnaapput.

-Kalaallit Nunaanni arnat siuariartupilooqaat. Arnat amerlanerusut ilinniagaqalernerisigut aamma ilaqutariit aaqqissuussaanerat arriitsumik allanngoriartorpoq. Tamanna arnanut iluaqutaavoq immaqalu meeqqat atornerlunneqartut ikileriarnerannut aamma pissutaaqataalluni. Arnat angerlarsimaffimminni oqartussaaneruleraangata meeqqat atornerlunneqartut ikileriartarput. Angusaqarnikooqaagut sulili suliassaqaqaluta, Henriette Rasmussen, Katuami aaqqissuussinermi aaqqissueqataasoq oqarpoq.

Kikkulluunniit politikerit peqatigalugit oqalliseqataanissaminnut tikilluaqqusaapput. Soorunalumi naligiissitaanermi killiffipput ingerlariaqqiffissallu eqqartorneqassallutik. Arnat pisortat akornanni, ilinniartitaaneq, Nunatsinni assigiinngitsuni najugaqartiterneq, kiisalu nivissanik arnanillu persuttaasarnerit kinguaassiuutitigullu kanngutsaatsuliortarnerit sammineqartussat ilagaat.

Partiit nittartagaat qimerloorlugit takuneqarsinnaavoq qineqqusaartut 30,5 procentii arnaasut. Partii Demokraatit arnartaqarnersaallutik 8-nik qinigassanngortitsipput angutillu qulit qinigassanngortillugit. Kattusseqatigiit partiiat arnataqannginnersaavoq, qinigassat angutit 15-iusut arnartaat pingasuinnaapput.

Siumukkut aamma arnartaqagaanngillat. Taakkua arnat 11-t angutillu 43-t qinigassanngortippaat. Tamannalu partiip arnartaasa ilaata allangortikkusugunarpaa. Ullumikkummi Doris Jakobsenip tusagassiuutinut nalunnarummini qinigaaffimmi kingullermi Inatsisartun i arnat ikinneruallaarsimanerat naammaginartinngilaa.

- Arnat meeqqanut akisussaanerusarnerat taamaammallu pisortatut atorfinikkunik meeqqatik qimallugit angalasariaqartarnissartik meeqqallu napparsimatillugit sulinngitsoortarnissartik tunuarsimaarutigisarpaat, Doris allappoq.

Nunatsinni suliffeqarfiit ilaqutariinnut politikkilioqqullugit Doris Jakobsenip kaammattorpai, pisortat politikerillu akornanni arnat amerliartorniassammata.

Katuap inersuaaraani aaqqissuussaq nal. 16.30 aallartissaaq Varnalu aliikkusersuisuussalluni.