Kinamiut kalaallit nuimasut pillugit paasissutissaataat tamanut saqqummiunneqartut
Paasissutissat Kinamiut suliffeqarfiutaannit, Zhenhuamit, katersukkat kalaallinut 60-init amerlanerusunut tunngasut tamanut saqqummiunneqarsimapput.
Paasissutissat taakkua ilaatigut Naalakkersuisut siulittaasuannut, Kim Kielsenimut Air Greenlandillu siulersuisuanni ilaasortanut arlalinnut tunngasut, aviisi Jyllands-Posten allappoq.
- Politikerinik taakkualu ilaqutaannik qulaajaaneq, taakkua soqutigisaannik taavalu sunniuteqarniaraanni kiminniaraannilu kikkunnik oqaloqateqarnissamik paasiniaaneruvoq, illersornissamut ilisimatusarfimmi ilinniartitsisoq Peter Viggo Jakobsen Jyllands-Postenimut oqarpoq.
AAMMA ATUARUK Naalakkersuisut: Centerip nunarput qarasaasiatigut illersussavaa
Kina Kalaallit Nunaanni mittarfissualiornissanut soqutiginninnerminik ersersitsinikuugami kalaallit aamma pillugit paasissutissaateqalersimanerat, taassuma tupaallaatiginngilaa.
Paasissutissanik katersivik pillugu ilisimasallit Kinami naalakkersuisut paasissutissanik tamakkuninnga pissarsisimassasut nalilerpaat.
Kinamiut suliffeqarfiutaat, Zhenhua, paasissutissanik tamakkuninnga katersisuusoq, inuinnarmit pigineqarlunilu Kinami naalakkersuisunut arlaannaatigulluunniit attuumassuteqanngitsoq, Kinap Danmarkimi aallartitaqarfiata Jyllands-Postenimut allakkatigut akivoq. Kinap internettikkut sorsuutilersaarneragaanera ilumuunngitsoq, aallartitaqarfik allappoq.