Nunatsinni namminermi pissutsinut attuumanerusut sammineqartut
Naalakkersuisut siulittaasorisimasaata Aleqa Hammondip siunnersuuteqarneratigut isumalioqatigiissitaq 2013-imi septembarip qaammataani pilersinneqarmat, Danmarkip nunasiaatilittut inuiaqatigiinnik kalaallinik innarliisarsimanera pilersitsinissamut ilaatigut tunngavilersuutigineqarpoq.
Ajornartorsiutilli taama ittut Saammaateqatigiinnissamut Isumalioqatigiissitap innuttaasunik naapeqateqartarnerani sammineqarnerpallaanngitsut, allattoqarfimmi pisortap Mari Kleistip Atuagagdliutinut oqaatigaa.
AAMMA ATUARUK Saammaateqatigiinnissamut Isumalioqatigiissitaq avannaani paasititsiniaalersoq
- Innuttaasunik oqaloqateqaraangatta taakku qallunaat kalaallillu inooqatigiinnerannut tunngasunik sammisaqarneq ajorput. Taakkuli oqaluttuaat namminneq inuunerminni unammilligassanut samminerusarput. Inuillu uummammiui nunatsinni namminermi pissutsinut attuumanerusarsorinarput, isumalioqatigiissitap allattoqarfiani pisortaq Mari Kleist aviisimut taama oqarpoq.
Tamannalu isumalioqatigiissitap angalaqqaarneranit misilittakkanut naapertuuppoq. Tasiilaq siorna tikeraarneqarmat innuttaasut pisariaqartinneqarnerpaatut oqaatigaat tunumiut kitaamiullu saammaateqatigiinnissaannik suliaq aallartinneqartariaqartoq.
AAMMA ATUARUK Tunumiut kitaamiullu saammaasseqatigiittariaqarsorigaat
Allattoqarfimmili pisortap Mari Kleistip danskit kalaallillu akornanni pissutsit sammineqarsimanerat aamma eqqaavaa, ilaatigut inatsisitigut ataataqanngitsunit aammalu Qullissarmiuusimasunit.
Isumalioqatigiissitap suliani 2017-imi ukiortaartinnagu naammassereersimassavaa.