Saammaateqatigiinnissamut Isumalioqatigiissitaq avannaani paasititsiniaalersoq
Ataatsimiititaliami ilaasortat sinneruttut marluk avannaanni illoqarfinni nunaqarfinnillu arlalinni innuttaasunik ataatsimiisitsinerit arlaqartut ingerlattussaavaat.
Ataatsimiisitsineq siulleq Qaanaami unnugu pissaaq ataatsimiisitsinerillu sinneri septembarip qaammataata qitequnnerata tungaanut ingerlanneqassallutik.
AAMMA ATUARUK Saammaasseqatigiinnissami inuiaqatigiit isumaat paasineqarnissaat pingaaruteqarpoq
Innuttaasunik ataatsimiisitsinerit siunertaraat isumalioqatigiissitap suliaanik paasissutissiineq, innuttaasunik oqaloqateqarneq aamma innuttaasut namminneq misigisaannik ilisimasaannillu paasissutissanik katersineq.
Isumalioqatigiissitami ilaasortat marluk Jens Heinrich aamma Ida Mathiassen, avannaani angalanerminni innuttaasut namminneq misigisaannik ilisimasaannillu paasissutissanik katersiniarput, Isumalioqatigiissitaq tusagassiuutinut nalunaaruteqarluni taama allappoq.
AAMMA ATUARUK Saammaasseqatigiinnissamut isumalioqatigiissitaq ilinniagartuut assortuussutigigaat
- Innuttaasunik ataatsimiisitsinerit saniatigut inuit ataasiakkaat inuunertik pillugu oqaluttuaannik katersiniarpugut. Inuunertik pillugu oqaluttuaat innuttaasut nammineerlutik oqaluttuaannut aallaaviussapput, taakkua nammineerlutik ajunngitsunik ajortunillu misigisaqarsimanerat kiisalu unammillernartut aqqusaarsimasaat katersorneqassapput, Ida Mathiassen isumalioqatigiissitaq sinnerlugu taama oqarpoq.
Innuttaasunik ataatsimiisitsineq siulleq pissaaq Qaanaami pingasunngornermi unnugu nalunaaqutaq 19.30 atuarfimmi Avanersuup Atuarfiani.
Avannaani innuttaasunik ataatsimiisitsinerit allat Siorapalummi, Upernavimmi, Kullorsuarmi, Uummannami Ilulissani aamma Saattuni pisussaapput.
