Saammaasseqatigiinnissamut isumalioqatigiissitaq ilinniagartuut assortuussutigigaat

Saammaasseqatigiinnissaq pillugu Isumalioqatigiissitaq pilersinneqarpoq, Naalakkersuisut siulittaaasorisimasaata, Aleqa Hammondip tamassuminnga ilugersuutiginninnerata kinguneranik. Tamannali Nunatsinnit Danmarkimillu akerleriiffiujuarpoq, tassami inuiaqatigiit taakku akornanni innuttaasut ilaannit suna siunertarineqarnersoq suli iluamik paasineqanngimmat.
 
Tamatumunnga ilutigitillugu, isumalioqatigiissitami danskit ilaasortaatitaqarnissaat, danskit ministeriunerata, Helle Thorning-Schmidtip kissaatiginngittuarsinnarpaa.
 
Sooq Saammaasseqatigiinnissaq pillugu Isumalioqatigiissitap pilersinneqarsimanera taamatullu atorunnaarsinneqartariaqaraluarnera, ilinniagartuunit assigiinngitsunik isummerfigineqartarpoq.
 
Isumalioqatigiissitap suliassaasa pingaarnersaraat, Danmarkip Kalaallit Nunaannik nunasiaateqarnerani qanoq pisoqartarsimaneranik qulaajaasoqarnissaa taamatullu Danmark Kalaallit Nunaanni inuiaqatigiinnut qanoq innarliitigisimanersoq paasiniassallugu.
 
Saammaasseqatigiinnissaq pillugu Isumalioqatigiissitap ingerlaannarnissaanik apeqqusiisut ilagaat, Ilisimatusarfimmi oqaluttuarisaaneq pillugu lektori, Thorkild Kjærgaard. Taanna Nunatsinni Danmarkimilu aviisini allaaserisaqartarluni.
 
Thorkild Kjærgaardip allaaserisaqartarnerata kinguneraa, inuiaqatigiit pissusaannik ilisimatusartup Klaus Georg Hansenip, Saammaasseqatigiinnissaq pillugu isumalioqatigiissitami ilaasortaasup, Thorkild Kjærgaardimut akerliulluni allaaserisaqarnera.
 
Klaus Georg Hansenip allaaserisaqarnermini oqaatigeqqaarpaa, Thorkild Kjærgaardip isummersuutai nutaajullutik isummersuutitsialaasut, kisiannili isumaqatiginagu allappoq, Thorkild Kjærgaardip danskit ministeriunerat, Helle Thorning-Schmidt isumaqatigimmagu oqarluni pisariaqanngitsoq danskit isumalioqatigiissitami ilaasortaatitaqarnissaat.
 
- Danskit tungaannit kalaallit Saammaasseqatigiinnissamut Isumalioqatigiissitaata maannamut paasissutissanik katersineranik, suli ingerlanneqarallartussamut, tamanna akuliunneruvoq, Klaus Georg Hansen tusagassiorfinnut nalunaarummini allappoq imalu nangilluni.
 
- Danskit taamatullu allat isummersuutigisinnaasaat pisariaqartippagut. Kisianni Thorkild Kjærgaardip ilanngussaa ima paasivarput, Kalaallit Nunaata nunasiaataasimaneranit oqaluttuaq danskit isumaannut naleqqusarlugu oqaluttuariniarneqartoq, Klaus Georg Hansen naliliivoq.
 
Taassuma aamma oqaatigaa, Isumalioqatigiissitamit kalaallit isummersuutaat pingarnerutinneqarmata, soorlu isumalioqatigiissitap suliassaani taama allassimasoqartoq, tassa ima paasillugu, Kalaallit Nunaata nunasiaataanerata oqaluttuassartaanik nutaamik isiginnilernissaq siunertarineqarluni, danskit isummersuutaat kisiisa aallaaviginagit. Klaus Georg Hansenip taama allannerminut tunngavilersuutigaa, Thorkild Kjærgaard taama isumaqarluni allassimammat.
 
- Sulinitsinni suut qanorlu pisarsimanersut aallaavigaagut, tassa Kalaallit Nunaanni inuiaqatigiit ilusilersueqataanerminni imminnut ataqatigiinnerat ersersinniarneqarlutik paasiniarneqarput. Pissutsit danskit oqaluttuarisaanerannit allaaserinnittartut saqqummersitsitsiniarnerminni ajoraluartumik takunngitsoortarsimasaat, soorlu Thorkild Kjærgaardip allaaserisaani tamanna ersertoq assersuutissatsialaalluni, Saammaasseqatigiinnissaq pillugu Isumalioqatigiissitami ilaasortaq, Klaus Georg Hansen taama allappoq.