Tunumiut kitaamiullu saammaasseqatigiittariaqarsorigaat
- Saammaasseqatigiinnissamik pisariaqartitsiffiusumik tigussaasumik tikkuagaqassagutta, taava tunumiut kitaamiullu saammaasseqatigiittariaqaraluarput!
Saammaasseqatigiinnissamik isumalioqatigiissitap Tasiilami innuttaasunik sapaatiummat ataatsimiititsinerani taama oqariartuuteqartoqarpoq.
Isumalioqatigiissitap oktobarip qulingiluaanit 14-ianut ataatsimiinnissami nalinginnaasut siullersaat ingerlappaa, Tasiilallu ataatsimiiffiunissaa toqqarsimallugu, Saammaasseqatigiinnissamik isumaqalioqatigiissitap sulineranut najukkami innuttaasut aallaqqaataaniilli peqataatinneqarnissaat anguniarlugu.
Innuttaasunik ataatsimiititsineq katersortarfimmi ingerlanneqartoq inunnit 40-50-init najuuffigineqarpoq, Tasiilarmiullu nalinginnaasumik isumaqarput Nunatsinni tunumiut kitaamiullu saammasseqatigiinnissaasa sulissutigineqarnissaa pisariaqarluinnartoq.
Tunumiorpassuimmi kitaamiunit naligiinngitsumik aammalu susinnaajunnaarsitaasimallutik misigisimapput, aamma tunumiut oqaasiisa kitaamiut oqaasiisulli akuerineqarnissaat kissaatigaat.
- Tasiilamiinnerput sulinissatsinnut toqqammavissaalluarsinnaavoq, aamma saammaasseqatigiinnissamik sammisaqartussamik najukkami suliniaqartoqalerpoq, isumalioqatigiissitanut ilaasortaq, Ida Mathiassen, oqarpoq.
Saammaasseqatigiinnissamik isumalioqatigiissitaq tulliani nuummi aappaagu januaarip qeqqani ataatsimiissaaq. Tassanilu 2017-ip tungaanut sulinissaq sukumiinerusumik eqqartorneqassalluni.