Kalaallit Illuutaat Ålborgimiittoq politikerinik pulaarneqarpoq

Naalakkersuisoq Martha Lund Olsen Folketingimullu ilaasortaq Doris Jakobsen Kalaallit Illuutaannut Ålborgimiittumut ullumi marlunngornermi pulaarput. Kalaallit Illuutaat Danmarkimi kalaallit illui allat assingalugit inunnik ikiortarialinnik ikiusarnermigut takutitsilluartuuvoq.

Allattoq Peter Troelsen, Simon Uldum

septembarip 03-at 2013 10:47

Kalaallit Naalagaaffeqatigiit kujasinnerpaavanut nuuttartut amerligaluttuinnarput, tamannalu ajornartorsiutinik assigiinngitsorpassuarnik aamma malitseqartarpoq. Tamannalu ajoraluartumik nuuttut nuuffigisaminni inuunermik nutaamik aallartitsinatik angerlarsimaffeqanngitsunngornerannik atornerluisunngornerannillu kinguneqartarpoq. Taamatut pisoqartillugu kalaallit illuutaat inuiaqatigiinnit katataalersut ornitassatuarilerajuttaarpaat.

Kalaallit illuutaasa suliarpassui suliniutaasut tunngavigalugit aningaasalersugaasarput, taamaattumillu oqitsuinnaanatik, aningaasammi satspuljekkut tunniunneqartut amerlassusaat apeqqutaatillugu ingerlanneqartarput. Ajornartorsiutaasut kommunit suliassarigaluarpaat, kommunilli ukiuni makkunani sipaarniarfigisaanni kalaallinut ikiortarialinnut suliniutit ajoraluartumik sipaarniarmit eqqugaasarput.

-Danmarkimi kalaallinut ikiortarialinnut nuna tamakkerlugu periusissaq akuerinikuuarput. Suliniutissalli piviusunngortinnissaannut akisussaaffik kommuniniippoq. Kalaallit sanngiinnerpaat sullinnissaannut ukiumoortumik 4 mio. koruuninik aningaasaliisoqartartuuppat ajornartorsiutit amerlanerit aaqqinneqatsiunnaassagaluarput. Kommunit naalagaaffiullu akornanni suleqatigiinnikkut tamanna qulakkeerneqartariaqarpoq. Tamannalu danskit aningaasanut inatsisissaannut atatillugu sulissutigissavara, Doris Jakobsen neriorsuivoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.