Kalaallit filmiliortartut tapiiffigineqarnissamik qinnuteqarfigisinnaasaannut millionilikkuutaanik immikkoortitsisoqaqqerataannaasoq

Filmiliat kalaallinut attuumassutillit ukiuni kingullerni maluginiarneqaatsiarlutik nersornaaserneqartussatut innersuunneqallattaaginnavittortaqaalupput. Kalaallinullu piviusulersaarusiortartunut tusarluarnartoqarataannaangajerlunarpoq.

Norddok II-mi ukiup naanerani atorunnaarnani atuutiinnassasoq, Foketingimi ilaasortaq IA-meersoq Aaja Chemnitz isumaqarpoq. Folketingimi ilaasortaaqatai marluk Savalimmiuneersut aamma taama isumaqarput.

Taamaammat Norddokip atuutiinnarnissaanik kissaateqarlutik Danmarkip aningaasanut inatsisissaa pillugu Folketingimi isumaqatigiinnialeruttornernut peqataaniarput. Norddok naalagaaffeqatigiinneq pillugu piviusulersaarusiortarnermut aningaasaliisartuuvoq.

- Nunatsinni filmiliortarnerup nukittorsarnissaa tapersorlugu politikkikkut sapinngisamik sulissutigissavarput. Filmiliorfissaqippoq, filmiliullaqqissoqarpoq nuannersunillu oqaluttuassaqqissoqarluni. Oqaluttuarisaanittalu nammineq oqaluttuarisinnaanissaa pingaaruteqarluinnarpoq, Aaja Chemnitz oqarpoq.

27,1 millionit koruunit Norddok II-mi 2024-p tungaanut atugassatut danskit aningaasanut inatsisaannit immikkoortinneqarnikuupput.

Aaja Chemnitz aalajangiisuussasuugaluaruni 30 millionit koruuninit ikinnerunngitsut amerlanernilluunniit Norddokip atuutinnaarnissaanut ukiuni tulliuttuni sisamani atugassatut immikkoortissagaluarpai. Taamaaliortoqassappat, aningaasat taakkua Atlantikup Avannaamiunut aningaasaliissutinit aaneqassapput. Folketingimi ilaasortat Atlantikup Avannaaneersut sisamat qallunaallu naalakkersuisui Atlantikup Avannaamiunut aningaasaliissutit Danmarkip aningaasanut inatsisaanneersuusut pillugit isumaqatigiinniuteqartuusarput.

Aningaasaliissutit annikingaatsiartut

Filmiliortartut nunatsinneersut Savalimmiuneersullu filmiliornermut tapiiffigineqarnissamik Det Danske Filminstitutimut qinnuteqarsinnaanngillat, Danmarkimili filmiliortartut nunatsinni Savalimmiunilu piviusulersaarusiornermut tapiiffigineqarnissamik Det Danske Filminstitutimut qinnuteqarsinnaallutik.

Tamannalu naalagaaffeqatigiinni filmiliortartut piviusulersaarusiornermut periarfissatigut naligiinnginnerannik kinguneqartoq, filmiliortartut nunatsinneersut arlallit isumaqarput.

Taamaammat Norddok II naalagaaffeqatigiinneq pillugu ilisimasaqarnerulernissaq siunertaralugu aamma Kalaallit Nunaanni Savalimmiunilu filmiliortarneq nukittorsarniarlugu pilersinneqarpoq.

Norddok atuutiinnassasoq, Folketingimi ilaasortaq Siumumeersoq Aki-Matilda Høegh-Dam aamma isumaqarpoq. Atuutiinnarnissaanulli aningaasat illikartit Atlantikup Avannaaniunut aningaasaliissutineersuunnginnissaat, taassuma kissaatigaa.

- Tassami isumaqarpunga Norddokip massakkut ingerlareernera ajunngitsumik ingerlasoq aamma ingerlaqqissinnaakutsoortoq, aamma ineriartortitsisinnaammat filmiliortartunik nunatsinninngaanneersunik, taanna oqarpoq.

Danmarkimmi kultureqarnermut ministereqarfia Norddokip atuutiinnarnissaannut aningaasaliisuusariaqartoq, Aki-Matilda Høegh-Dam oqarpoq.

Norddokimi Danmarkimit pilersitaasutut taassuma isigaa, taamaammallu isumaqarpoq atuutiinnarnissaanut Danmark akisussaasuusoq.

- Pissutigalugu aningaasat, tassa taanna Nordatlantpuljemik taaneqartartumi, annikingaatsiareertut atorusunnerugakkit oqartussaaffippassuit nunatsinniittut ineriartorluarnissaat anguniarlugu, Aki-Matilda Høegh-Dam oqarpoq erseqqissaatigalugulu aningaasat isumaqatigiissutigisinnaasatik annikingaatsiarmata nunaqqatiminut toqqaannaq malunniuteqarnissaat angorusunnerugini.

Nunarput suleqataalertariaqaraluartoq

Det Danske FiIminstitutip Norddok II-mik nalilersuineq pillugu nalunaarusiaa septembarimi saqqummerpoq. Norddokimut qinnuteqaatit Det Danske FiIminstitutimi suliarineqartarput.

Piviusulersaarusiamik filmiliornermut tapiiffigineqarnissamik Norddok II-mut  maannamut qinnuteqaatit 130-usut, Det Danske FiIminstitutip nalunaarusiaani allaqqavoq. Aningaasat qinnutigineqartut katillutik 50,1 millionit koruuniupput, tapiissutigineqartullu katillutik 20,7 millionit koruuniullutik.

Norddokili atuutiinnassappat, tamanna nutaanik periarfissiisussaassaaq – nunarpullu suliniummi tassani aamma suleqataalertariaqaraluartoq, Aaja Chemnitz oqarpoq.

- Allaffissornikkuusinnaavoq, piginnaanngorsaanikkuusinnaavorluunniit Det Norddokimit tapiiffigineqartut Dansk Filminstitutimeersuinnaannginnissaat anguniarlugu, kalaallilli aamma peqataatinneqarnerunissaat, taanna oqarpoq.

Danmarkip aningaasanut inatsisissaa pillgu suli isumaqatigiinniartoqaleruttorpoq. Taamaammat Norddokip atuutiinnarnissaanut  aningaasanik ilumut illikartitsisoqareersimanersoq suli uppernarsarneqanngilaq.

Danmarkip naalakkersuisuisa aningaasat Norddok II-mut atugassatut immikkoorteriikkatik 3,5 millionit koruuninik 2024-mi ilalersaarpaat. Aningaasat taakkua naalagaaffeqatigiinneq pillugu ilisimasaqarnerulernissamut 2024-miit 2027-mut atugassatut immikkoortinneqareersuneersuusut, Danmarkip kultureqarnermut ministereqarfiata tusagassiorfinnut qaammatip matumani siusinnerusukkut nalunaarutaani allaqqavoq.