Kalaallit Danmarkimi najugaqartut palasitaarnissaat qanillivoq
Kalaallit peqatigiiffiisa kattuffiat, Inuit, atorfinitsitsiniarnermi ataatsimiititami ilaasortaatitaqarpoq, kattuffiullu siulittaasuata Bitha Metelmannip oqaatigaa 4-5-inik qinnuteqartoqarsimasoq tamarmillu atorfimmut piukkunnarluartuusut. Taakkunannga qinnuteqartoq ataaseq, Danmarkimi kalaallinut palasissatut piukkunarluinnartup, atorfinitsinneqarnissaanut innersuussisimasoq sulittaasup oqaatigaa.
Palasimik kalaallisut oqaluttumik atorfeqartitsineq naalagaaffiup aningaasalersorusukkaa, danskit ilageeqarnermut ministeriata novembarimi 2011-mili nalunaarutigaa. Ministerip 2012-imi aasaanerani atorfinitsitsisoqarnissaa naatsorsuutigalugu taamani oqarpoq. Ukiorli ataasingajak maanna kinguaattoorsimalerpoq. Atorfinitsitsiniarnerup taama sivisutigisimanera Bitha Metelmannip uggoraa.
Namminersorlutik Oqartussat palasiat kalaallinik Danmarkimut nuussimasunik aasaq kingullerli kuisitseqqusaanngilaq, apersortitseqqusaanngilaq, katititseqqusaanngilaq iliseqqusaananilu. Kalaalerpassuit Danmarkimi najugaqartut piffissami tassani palasinik danskinik atuisariaqarsimapput.
- Pingaartumik ilisinernut tunngatillugu ajornerpaavoq, Bitha Metelmann oqarpoq, aamma ilaasortami akornanni ugguarnerup annertusiartuinnarnera malugisinnaallugu oqaatigaa.
Århusip biskoppeqarfiata paasissutissiissutigaa, atorfik inuttarsiorneqalermalli atorfinitsitsinissamut tunngatillugu attuumassutillit assigiinngitsut tusarniaaffigineqarsimasut – ilaatigut kalaallit peqatigiiffiisa kattuffiat Inuit, domprovsti, Århusimilu Vor Frue Kirkemi, palasip atorfiniffigisassaani ilagiit sinnissaat.