Kalaallit Danmarkimi immikkoortinneqartarnerat misissuiffigineqalerpoq
Immikkoortitsisoqartarsimanersoq paasiniarneqassaaq iliuusissatut aningaasaliissutit pillugit isumaqatigiissutip malitsigisaatut. Misissuisitsinermi kalaallit peqataatinneqarnissaat Folketing-imi Inunnik isumaginninnermut ataaatsimiititaliami siulittaasup, Özlem Cekicip, siunnersuutigaa.
- Kalaalerpassuit assigiinngisitsinermik misigisaqartartut nalunngilarput, assigiinngitsisarnerli pillugu misissuisitsisarnerni kalaallit peqataatinneqarneq ajorput, qallunaatut isigineqartaramik, Özlem Cekic oqarpoq.
Qineqqusaarnerup nalaani Københavnimi Kalaallit Illuutaanni qineqqusaartoqarnerani isumassarsiaq pissarsiaraa. Qinersisartut taamani neriorsorpai, kalaallit Danmarkimi aassigiinngisitaasarneri pillugit misissuisitsisoqarnissaa aqqutissiuunniarlugu, tamannalu maanna tassa piviusunngortilerpaa.
Misissuisitsinerup inernera Özlem Cekicip qilanaaraa, neriorsuutigalugulu piviusunngorumaartoq.
Naligiissitaaneq pillugu Nunatsinni siunnersuisoqatigiit Naligiissitaaneq pillugu ministeriaqarfimmut allakkanik nassitseqqammerput, kalaallinut Danmarkimi najugalinnut assigiinngisitsisarneq tassani arlalitsigut tikkuartorneqarluni.
