Kalaallit atugarliortut pillugit Danmark iliuusissamik pilersaarusiorpoq
Pilersaarusiornissaq Christiansborgimi isumaqatigiissutigineqaqqammersup inerneraa.
- Uani sunarpiaq sulissutigissaneripput pilersaarusiap takutissavaa. Aaqqiigallarnerit atorneqassappat imaluunniit siunissamut isiginerusumik sanassaagut? Kalaallit Nunaat pilersaarusioqatigineqassaaq, kalaallillu pillugit ilisimasaqarluartut aamma suleqatigineqassallutik, Folketingip isumaginninnermut ataatsimiititaliaani siulittaasoq Öslem Cekic oqarpoq.
Pilersaarut kalaallinut Danmarkimi najugalinnut atugarliortunut suliniutinik nutaanik pilersitsissaaq, aamma taakku aningaasaliiffigineqassapput, oqarpoq.
- Kalaallinut Danmarkimi najugalinnut, atugarissaarpallaanngitsunut taamatut pilersaarusiorutta, isumaqarpoq, ullumikkut aningaasaliissutaareersut qaavisigut aningaasanik immikkoortitsissasugut, suliniutimmi aningaasaliiffigineqartariaqarput. Taamaaliunngikkutta isumassaqanngilaq, Öslem Cekic oqarpoq.
Suliniutissatut pilersaarut suliarineqassaaq suliniutissat 2013-mi aningaasaliifiginissaat isumaqatigiinniutigineqalerpata
.