Kalaallit arnartai nuimasut nersorniarneqarput

Aviisip AG-ip allaaserisaani Kommuneqarfik Sermersuup borgmesteria, Asii Chemnitz Narup arnat inuiaqatigiinni immikkut ittumik suliniuteqarsimasut allattorsimaffiannut Kvindernes Blå Bogimut ilanngunneqarpoq.

Atuagaq arnat immikkut suliniuteqarsimasut pillugit allattorsimaffik Kvindernes Blå bog arnat qinersisinnaalernerannit ukiut 100-it qaangiunnerat malunnartillugu saqqummersinneqarpoq.

Arctic Umiaq Linep pisortaa, Jette Larsen Finlandip Kalaallit Nunaanni generalkonsuliatut toqqarneqarpoq. 

Taama nalunaaruteqarpoq, danskit nunanut allanut tunngasunut ministeriaqarfia.

Jette Larsen septembarip arfineq aappaanni generalkonsulitut ivertinneqarpoq.

Jette Larsenip Nunatsinnut tunngassuteqartut tamaasa sammisassarissavai.

- Tatiginninneq annertooq uannut tunniunneqartoq nuannaarutigaara, Jette Larsen KNR-imut oqarpoq.

Finlandip Nunatsinni generalkonsuleqalernerata saniatigut nunat Frankrig, Holland, Belgien aamma Luxembourg konsuleqarput. Taamatullu letland, Canada, Tyskland, England aamma Norge Sverigelu nunatsinni konsuleqarlutik.