Kalaallit Airportsip suliariumannittussarsiuussinissani kinguartikkaa
Naalakkersuisut Nuummi mittarfiliornerup avatangiisinut sunniutigiumaagai pillugit nassuiaammut inaarutaasumik akuersissuteqarnissaa aamma Naalagaaffimmut aningaasalersuinermut atugassarititaasut pillugit isumaqatigiissutip inissinnissaa utaqqisaapput.
Kalaallit Airportsip siulersuisuisa siulittaasuat Jóhannus Egholm Hansen taama oqarpoq:
- Sanaartornermik suliaqarnissanut neqeroortitsinerup nassiunneqarnissaata kinguartinnissaa toqqarparput, pissutigalugu VVM-mut akuersissuteqarnermut piumasaqaatit inaarutaasut taakkualu aningaasaqarnikkut sunniutissaat suli ilisimannginnatsigu, Jóhannus Egholm Hansen oqarpoq.
AAMMA ATUARUK Mittarfittaassap isikkorinnerunissaanut suliaq aallartereerpoq
Neqeroortitsinerup januaarip naalernerani nassiunneqarsinnaanissaa naatsorsuutigisimagaluaraat, taassuma ilanngullugu oqaatigaa, killissaliussassalli suli inissinneqannginnerat pissutaallutik neqeroortitsinerup kinguartinneqarnissaa aalajangerneqartoq Egholm Hansen oqarpoq.
Pisortap 2023 ammaanissaq suli upperaa
Sanatitsisup entreprenørillu neqerooruteqarsinnaalernissamut piumasaqaatit tamaasa ilisimanissaat pisariaqartoq, Jóhannus Egholm Hansen oqarpoq, taamaanngippammi suliassap allannguutaasa akisunerulersitsisut amerlavallaalersinnaammata.
- Piffissaliussat taakku iluanni suliassat kinguartilaarneqarnissaat pisussaammat. Taamaattumik aamma soorlu qaartiterinerit aallartinneqarnissaat kinguartinneqarnissaat ilimanarsinnaavoq. Kisianni neriuppugut ulluni qaninnerni paasissallugu kinguartitsineq qanoq kinguneqassanersoq. Maannakkorpiaq naliliinerput unaavoq suliassap naammassinissaa allannguuteqassanngitsoq, tassa 2023-mi ukiakkut naammassinissaa naatsorsuutigaarput suli, Kalaallit Airportsip pisortaanera Steffen Ulrich-Lynge oqarpoq.
AAMMA ATUARUK Asiip mittarfissaq takujuminartuutinniaraa
