Asiip mittarfissaq takujuminartuutinniaraa
Mittarfittaassaq illoqarfiup pingaarnerup ilisarnaatissaatut eqqarsaatigalugu takujuminarsarneqarsimanngitsoq, Kommuneqarfik Sermersuup borgmesteria Asii Chemnitz Narup ilaatigut isumaqarpoq:
- Mittarfiup tallinera Nuup illoqarfiata isikkuanut sunniuteqartorujussuussammat isigiuminartumik mittarfiliortoqarnissaa soorunami kissaatigaarput. Taannalu isuma attarparput. Avatangiisinut sunniutissat pillugit nalilersuinermi atuaqqissaareerneratigut kingorna erseqqissorujussuarmik nalunaarpugut mittarfiup tallineqarnissaa nuannaarutigisorujussuugipput, Asii Chemnitz Narup oqarpoq, nangillunilu:
AAMMA ATUARUK Mittarfiit pillugit avatangiisinut nalunaarut tusarniaassutigineqaqqittoq
- Peqatigitilluguli aamma avatangiisinik illersuinissamik pinngortitamillu eriaginninnissamik pingaartitsigatta taakkua immikkut aamma oqaaseqarfiginikuuagut, borgmesteri oqarpoq.
Mittarfiup pioreersup tallilerneqarnissaanut Nuup ukiorpassuarni kissaataata piviusunngortussanngornera eqqarsaatigalugu mittarfittaassap isikkua sooq taama pingaaruteqartiginersoq apeqqutigaarput, Asii Chemnitz Narupilu ima akivoq:
AAMMA ATUARUK Talliliineq nipiliorfiussaqisoq
Kusanartumik mittarfeqarniartut
- Oqaatigeqqilaaginnassavara kommunalbestyrelsimi tamarmiulluta, 19-iulluta, mittarfiup tallineqarnissaa ingiaqatigiilluinnarluta illersortuarnikuuarput, aamma kingunissai pitsasut qilanaarutigivagut. Taamatullu oqareerlunga oqaatigissavara naluneqanngitsutut mittarfik illoqarfiup qeqqata-tungaasaani inissittussanngorpoq, Nuup illoqarfiata pinnereeqisoq kusanaallisarneqassanngimmat. Taanna oqariartuutigivarput, Asii Chemnitz Narup oqarpoq.
Illoqarfiimmi allat, taama mittarfwqanngitsut eqqarsaatigalugit taama isumaqarnissaq nukattitatut iskkoqalersitsinngila?
- Oqaatigisariaqarpara: Uagut kommunalbestyrelsimi misigisimajuaannarpugut soorunami aamma pisussaaaffeqarluta Nuup illoqarfiata isikkorissaarnerata aamma attattuarneqarnissaa. Aamma oqaatigilara: Mittarfittarneq aammalu atuuffissaa kiisalu isikkua, taakkua imminnut akerleriittariaqanngillat. Taakkua oqimaaqatigiissutut naammassineqarsinnnaasutut upperivarput, aamma oqaatigilara: Maani allaffissornermi aqutsisuma Kalaallit Airpotsimik oqaloqateqarnera pitsaasumik ingerlavoq, taamaattumik kissaativut pitsaasumik aaqqinneqarsinnaanerat upperaara, Kommuneqarfik Sermersuup borgmesteria Asii Chemnitz Narup oqarpoq.
