Nuummi mittarfik: Talliliineq nipiliorfiussaqisoq

Mittarfinnut pilersaarut Inatsisartuni siamanngormat akuerineqarpoq, Nuummilu mittarfiup tallilernissaanut VVM-imik nalunaarusiaq tusarniaassutigineqaqqittoq tallimanngornermi nalunaarutigineqarpoq.

Avatangiisinut nalaakkersuisoqarfiup sanaartornermut atatillugu nipiliornerit naatsorsornerannik allannguisoqarnera ilaatigut pissutigalugu tusarniaasoqaqqinnerarpaa.

VVM-imik nalunaarusiaq suliniutip sananeqarnerani mittarfiullu atulernerani avatangiisitigut kingunerusussanut tunngavoq.

Nuummi innuttaasut mittarfiup pingaartumik sananeqarnerani nipitigut sunnerneqassasut, nalunaarusiami allassimavoq:

- Sanaartornermi piffissaq tamakkerlugu nipiliortoqartarsinnaavoq, inissiaqarfinnut mittarfimmut qaninnerpaanut Nuussuup eqqaaniittuni aamma ilaatigut Qinngutsinni unnuakkut sanaartornermi nipiliornissamut killigitat atuuttunik qaangiisunik.

Nipiliorneq pinnngitsoortinneqarsinnanngitsoq

Sanaartornerup ingerlanera tamaat, tassa ukiut pingasut affarlu, sanaartornermik suliaqarnermit akunnerit 24 tiimit, sapaatip akunnerani ullut tamaasa nipiliortoqartassasoq nalunaarusiami allassimavoq.

Nipiliornermillu akornusersuinissat pinngitsoortinneqarsinnaanngitsut naluanarusiami naliliinermi allassimavoq:

- Sanaartornermi sulianit nipiliorneq pinngitsoortinneqarsinnaanngilaq. Nipiliornermut sunniuteqartunillu assiaqutiniknaammattunik ikkussuisoqarsinnaanngilaq, nalunaarusiami naliliipput.

AAMMA ATUARUK Mittarfiit pillugit avatangiisinut nalunaarut tusarniaassutigineqaqqittoq

Mittarfik sananeqareerluni atulerneqaruni mittarfimmiit nipiliornerit ataatsimut isigalugit ingasannerulaalerersimassasut nalunaarusiami allassimavoq.

- Kisianni nipiliornerup killingatut missingersuutit inissiaqarfinni eqqortinneqarsinnaassapput, aamma ataatsimut isigalugu sunniut annerulaalissaaq, nalunaasiami allapput.

Kalaallit Airports A/S tusarniaaqqittoqarneranut atatillugu Nuummi innuttaasunik decembarip aqqarnanni ataatsimiititsissaaq.

Ilulissani mittarfiliornissamut suliniummut VVM-imik nalunaarusiaq tusarniaassutigineqareernikuuvoq Naalakkersuisuniillu akuerineqareerluni.

Assi © : NIRAS / Kalaallit Airports A/S - Ikke teknisk resumé af VVM-redegørelse

Takussutissiaq 1.3-mi ersersinneqarpoq mittarfiliorfiuussap kujasissuani sanaartornermi

sulianit nipiliornerup siaruarnera, tassaasoq, inunnik amerlanerpaanik nipiliornermik sunniiffiusinnaasoq. Soorlu takuneqarsinnaasoq Nuup ilarujussuani ingammillu Nuussuup ilaani aamma ilaatigut Qinngutsinni nipiliornermut ilapittuut 40 dB(A)-mit qaffasinnerussaaq. Sanaartornermi sulianut inissiaqarfiit

eqqaanni unnuakkut nipiliornermut killigititaq atuuttoq tassaavoq 40 dB(A). Ullukkut unnukkullu nipiliornermut killigititaq tassaavoq 70 dB(A), kisianni inissiaqanngilaq, nipiliornermut ilapittuumik 50 dB(A)-mit qaffasinnerusumit sunnerneqartunik.

Najoqqutarisaq: Teknikkitiguunngitsumik eqikkaaneq ASN-nalunaarusiaq, KALAALLIT AIRPORTS A/S.