Uummannami imeqarfik minguerukkaluartoq kuuffimmit suli imertoqarsinnaanngilaq
Nukissiorfiit Uummannami erngup imerneqartussap uuliamik mingutsinneqarneranik ajutoortoqarmalli ingerlaavartumik saliinissamik misissuisarnissamillu pilersaarutinik Nukissiorfiit ingerlatsipput.
Tamanna tunngavigalugu Nukissiorfiit sapaammi avatangiisinut oqartussaasunit akuersissummik pissarsipput - Uummannami imermik pilersuinerup ammaateqqinnissaanut.
Nukissiorfiit taama nalunaaruteqarput.
Imeqarfik akoqanngitsumik imermik pilersuilerpoq. Erngulli aqqutai suli akuerineqaratik.
AAMMA ATUARUK Uummannami imeq suli uuliaqalaarmat imerneqarsinnaanngilaq
Erngup, erngup aqqutaaneersup aamma imiisivinni tankineersup atorneqarsinnaalernissaat ilungersuutigalugu manna sulissutigineqarpoq.
Aaqqiissutigineqartup ataasinngornermi septembarip ulluisa 30-anni tusarliutigineqarsinnaanera neriuutigineqarpoq.
Nukissiorfiit imeq imeqarfianeersoq maannakkut imerneqarsinnaasutut akuerineqarnera aallaavigalugu Avannaa Seafood aamma Royal Greenland biilit imertaassuit atorlugit imermik pajuttarnissaq pillugu oqaloqatigineqarput, fabrikini taakkunani marlunni tulaassuineq aallarteqqinniarlugu. aaqqiissutigineqartoq ullumi ataasinngornermi tusarliutigineqarsinnaanera neriuutigineqartoq Nukissiorfiit nalunaarutigaat.
AAMMA ATUARUK Peter Grønvold Uummannameersoq: Taama nalaataqariataarneq sakkortoorujussuuvoq
Soorlu siornatigut nalunaarutigineqareersutut marlunngornermit innuttaasut imeq maqinneqarsinnaasoq atorsinnaavaat uffarnerminnut, erruinerminnut aamma atisanik errorsinermut.
Innuttaasut imermut tankiutillit imeq errortornermut, atisanik errorsinermut aamma eqqiaanermut atorsinnaavaat.
Erngup illup iluani qorlorfia uuliamik mingutsitsineq ilisimaneqalermalli atorneqarsimanngippat, taava imeq atorneqannginnerani sivisulaartumik kuutseqqaarneqassaaq.
Nukissiorfiit taama nalunaaruteqarput.