Kalaallini talermittartuni aatsaavissuaq nunarsuarmi talerminnermut pissartanngorniunnerni peqataasoqassaaq
Unammeqatigiinni 90 kilo ataallugu oqimaassusilinni peqataassaaq. Danmarkimi siorna ukioq mannalu pissartanngorniuttoqarnerani kalaaleq taanna guldinnappoq. Taamatuttaaq Sverigimi nunat assigiinngitsut akornanni ukioq manna unammisoqarmat Minik Johansen peqataavoq.
Minik Johansenip klubbia oqaluttuarpoq talermittartoq ukioq manna ullut tamaasa sungiusartarsimasoq, maannakkorpiarli eqqissisimaartoq VM-imullu peqataaqqaarnissaminut piareersartoq.
- Maannakkorpiaq taamaallaat Minik misilittakkamigut ukiumigullu peqataasinnaasuni piukkunnaateqartoq, Armwrestling Greenland tusagassiuutinut allakkamini nalunaarpoq.
Elite Sport Greenlandip aningaasatigut tapiineratigut Minik Sune Trondheim Johansen kisimiilluni Kuala Lumpuriliassaaq, kattuffiulli aningaasaqarniarnera pissutigalugu sungiusaasoq ilaasinnaanngitsoq, Armwrestling Greenlandip siulittaasua Lars Jørgen Pedersen allappoq.
