Kalaalimineerniarfik kalaaliminernik tuniniaaviuli
Nuummi kalaalimineerniarfiup sunik tuniniaaffiusinnaaneranut sukannersunik malittarisassaqarpoq, Brugsenilli saavani, Kalaalimineerniarfimmit meterinik 50-inik ungasitsigisumi Kalaalimineerniarfimmi tuniniaqqusaanngitsut nioqqutigilluarneqartarput. Inuiaqatigiit aningaasaqarnerat eqqarsaatigalugu tamanna ajorluinnarpoq. Inuiaqatigiit akileraarutitigut iluanaarutiginngitsoortarpaa.
-Nuummi Kalaalimineerniarfimmi 10 mio. kr.-it missaat kaaviaartinneqarput, kaaviiartitalli taakku ullumikkut ikinneerarsuupput. Innutaasut nunattalu karsia tamatumani ajorsartunngorput, tamannalu sukkanerpaamik allanngortittariaqarparput, Peter Davidsen Kommuneqarfik Sermersuumi Siumut sinnerlugu qinigassanngortittoq knr.gl-imut oqarpoq.
Peter Davidsenip tamannarpiaq malunnartinniarlugu Nuummi Kalaalimineerniarfiup saavani pingasunngormat nal. 13.00 suliniuteqarpoq. Nioqqutit Kalaalimineerniarfimmi nioqqutigineqaqqusaanngitsut, ungasinngisaanili nioqqutigineqartut takutippai. Siumut kommunimut qinersinermut atatillugu pingaarnertut qineqqusaarutaasa ilaat, tassalu kalaaliminertornerulernissaq, immikkut sammineqarnisaa kissaatigaa.
-Nerisassat assigiinngitsut arfineq pingasut nassarniarpakka, taava init takusinnaassavaat suut pisiarisinnaannginnerlugit. Nunatsinni nerisassatigut ileqquvut sammisariaqarpagut, aamma nerisassiornikkut kulturerput ukiuni 100-linni ineriartortissimasarput ingerlateqqissavarput. Sooq kapisilinnik nutaanik tuniniaasoqaqqusaava, kapisilinnillu pujuukkanik tuniniaasoqaqqusaanani? Sooq tuttup neqaanik nutaamik tuniniaasoqaqqusaava, panertulli tuniniaqqusaanatik? Ataqatigiinngilluinnarputq, Peter Davidsen isumaqarpoq.
