ASSIT Kalaaliararmiut assigiinngitsorpassuarnik ulapputeqartut
Kalaaliaqqami siulittaasoq nuannaartoq KNR-ip oqarasuaatikkut ataasinngornermi oqaloqatigaa. Peqatigiiffik Hellebæk Kirkemi sapaatiummat naalagiartitsivoq kingornalu kaffillerlutillu juullerpalaartitsipput.
- Ajunngitsumik ingerlavoq, aggiasoqangaatsiarpoq, Peqatigiiffimi siulittaasoq Nuuni Heilmann oqarpoq.
Kalaaliaraq ukioq manna maajip arfernani pilersinneqarpoq, ilaasortanngorniarlutillu nalunaartut imaaginnavipput.
- Peqatigiiffipput ingerlalluaqaaq, aamma ulapeqaagut, Nuuni Heilmann oqarpoq.
Peqatigiiffik Nordsjællandimi inissisimagaluartoq Jyllandimit Sverigemiillu ilaasortaqarlutik Nuunip oqaluttuaraa.
- Ilaasortatta ilaat Sverigeminngaanniit Helsinborgikkoorlutik ikaartarput, Sverigemit ilaasortatik pillugit Nuuni taama oqarpoq.
Kalaaliaqqami siulersuisut
Kalaaliaraq siusinnerusukkut, Anders Lund Madsen pulaartoralugu kaffillernikuuvoq, unnummi kulturisiorfimmi Helsingørimi Hornbækimilu peqataavoq allanillu siunissami aaqqissuussissamaarluni.
Peqatigiiffiup aaqqissuussinissaa tulleq tassaavoq, Helsingørimi kulturværftimi qatituup tullianik Josef Lund Josefsenip pattagiartartullu Jim Milnep juullimut tusarnaartitsineranik decembarip 18-iani arfininngornermi aaqqissuussinissaq.
Hellebækimi sapaatiummat naalagiaqatigiinnermi assilisat takukkit