Kalaaliaqqami eqaluit pujuukkat pisiassaalernavianngillat
Kalaalimineerniarfilluunniit Nuutoqqamiittoq ukiup nikinnerata missaani pilersaarutigineqartutut nutartigaalluni ammaqqikkaluarpat.
Kommuneqarfik Sermersuumi Teknikkeqarfimmi ingerlatsinermi pisortap Frank Rasmussenip ilisimalluarpaa kalaalimerngit suliareriikkat piumaneqarluartartut.
- Tamanna tusakulavarput. Pisortatigoortumittaaq saaffigineqartarpugut aalisakkat pujuukkat panertullu, aammali tuttut neqai qerisut piniarneqarunnaarnerisa kingorna sooq tuniniartanngikkivut, Frank Rasmussen oqarpoq.
Kalaalimineerniarfik nutaaq
Kalaalimineerniarfiup nutaap Nuup qeqqaniittup tuniniarneqarnissaa qanittukkut akuerineqarpoq. Taannami kommmunimut ukiut tamaasa tre millionit angullugit aningaasartuutaasarpoq, soorlu illumik attartornermut, imermut, kiassarnermut, bilinut oqarasuaatinullu.
Aamma atuaruk Nuummi Kalaaliaqqap amigartooruterpassuani ajornartorsiutigai
Illoqarfiup kalaaliminernik tuniniaavia Nuutoqqami avatangiisini nutaani ammaqqittussanngorpoq, akikinnerusumilli ingerlanneqartumik.
Kalaalimineerniarfittaassami pisiniat aalisartut tuniniaagaat pillugit oqaloqateqarsinnaalissapput.
- Tuniniakkat sumi pisaava, qanga pisarineqarpa, taava pisinermi pisiap oqalutuassartaa ilanngullugu paasineqassaaq. Imaassinnaavoq tamanna ullumikkut maqaasineqartoq.
Nikkut, pujuukkat allallu suliareriikkat tuniniarsinnaanngilaat
Nersutilli neqai pujuukkat nammineq isumagisariaqassapput. Nutaamimmi kalaalimineerniarfittaaraluaraanniluunniit pisisartut inuussutissanik suliarisanik pisinissartik naatsorsuutigissanngilaat. Soorlu nikkunik, tuttunik pujuukkanik aserortikkanilluunniit, aalisakkanik siatanik imaluunniit ruuanik nammineq naatitanik.
Aamma atuaruk IA: Namminersortut kalaaliaraq ingerlassinnaavaat
Namminersorlutimmi Oqartussat nersutit nakorsaat pillugit inatsisaa 1998-imeersoq tamatuminnga naalleraasuusoq, Frank Rasmussen oqarpoq.
- Aalisartut piniartullu tuniniagassamik misissorneqarnissaannut piumaffigineqanngillat, ilisimaneqartanngilarlu saligaatsuunissamut piumasaqaatit iluamik naammassisimaneraat. Ilisimaneqartanngilaq qerisut qanorpiaq qeritinneqarsimanersut. Tassalu tuniniaasinnaatitaannginnermut tamanna pissutaarpiartoq.
Nammineq suliarisimasat silami tunisaalluartarput
- Tassalu tamannarpiaq ajornartorsiutaasoq, kommunimi sanaartugassanut ataatsimiititaliami siulittaasoq politikkikkut aakisussaasoq Mille Søvndahl Petersen oqarpoq, nangillunilu:
- Nammineq suliarisimasanik tuniniaasoqaraangat assorsuaq tunineqarluartarput, soorlu silami, tamannali navianarsinnaavoq.
- Tamakkunannga pisisut namminneq akisussaaffigisarpaat, ilisimaneqartanngilaq tamakku qanoq sivisutigisumik uninngasimanersut, qanorlu suliarineqarsimanersut, Kommuneqarfik Sermersuumi Sanaartornermut ataatsimiititaliami siulittaasoq, Inuit Ataqatigiinneersoq Mille Søvndahl Pedersen, KNR-imut taama oqarpoq.