IA: Namminersortut kalaaliaraq ingerlassinnaavaat

Naak kommunit illoqarfinni ataasiakkaani kalaaliaraqartarnissaa pisussaaffigigaluaraat, aalisartut piniartullu pisaatik tuniniarsinnaaniassammassuk, taava kalaaliaqqat ingerlanneqarnissaannut kommunit inatsisitigut pisussaaffiginngilaat.
Assi © : KNR
Allattoq Charlotte Holten-Møller
marsip 20-at 2016 15:43
Nutserisoq Mads Lynge

Nuup qiterpasissuani kalaaliaraq 2010-mi ammarmalli Kommuneqarfik Sermersuumut ukiumut 3 millionit koruunit missaannik aningaasartuutaasimavoq.

Kalaaliaraq suliariumannittussarsiuunneqassaaq

Kalaaliaqqamillu suliariumannittussarsiuussisoqarnissaa, Kommuneqarfik Sermersuumi Sanarfinermut Avatangiisinullu Ataatsimiititap siulittaasuata Mille Søvndahl Pedersenip siunnersuutigaa:

- Isumaqarpunga tamanna isumassarsiatsialaasoq. Suliassat ilaat suliariumannittussarsiunneqarsinnaassappata tamanna periarfissaasinnaassaaq, Mille Søvndahl Pedersen, Sanarfinermut Avatangiisinullu Ataatsimiititap siulittaasua, Inuit Ataqatigiinneersoq, oqarpoq.

Najukkami aalisartut piniartullu peqatigiiffiata namminersortulluunniit matumani neqerooruteqartinneqarsinnaanissaat taassuma takorloorpaa:

- Imaassinnaasoq Kalaaliaraq pitsaanerusumik ingerlassinnaassagaat, Mille Søvndahl Pedersen oqarpoq.

Kalaaliaraq tuniniarneqartoq

Kalaaliaqqap maanna atuuttup tuniniarneqarnissaa kommunip aalajangernikuuaa, kalaaliaratoqarlu Nuutoqqamiittoq atulerseqqinniarlugu, taamatullu aalajangernerup tunuliaqutaa Mille Søvndahl Pedersenip ima nassuiaateqarfigaa:

- Ingerlatsinermut aningaasartuutip kommunimit akisussaaffigineqarunnaarnissaa siunertaavoq, oqarpoq.

Kalaaliaqqamik ingerlatsisinnaasut kommunimit oqaloqatigineqalereersut, kommunip teknikkeqarnermut ingerlatsinermullu immikkoortortaqarfiani ingerlatsinermut pisortap Frank Rasmussenip oqaatigaa:

- Aalisartut piniartullu peqatigiiffiata ingerlatsinissaq soqutigisinnaavaa. Internetiluunniit aqqutigalugu nioqquteqarniat aamma soqutigisinnaavaat. Tunisassioriaatsit ullumikkut assigiinngitsorpassuupput, assersuutigalugu Kalaaliaqqap internetikkut tuniniaasalersinnaanissaa takorloorneqarsinnaalluni, Frank Rasmussen oqarpoq.

Eqqiluisaarnissaq tuniniagassaqartarnissarlu

Kikkulli oqaloqatigineqarnersut taassuma oqaatigerusunngilaa.

Kalaaliaqqamilli ingerlatserusuttut piumasaqaatit pingaartumik marluk malittariaqassagaat Mille Søvndahl Pedersenip oqaatigaa:

- Eqqiluisaarnermut malittarisassat soorunami malinneqassapput, tassa piumasaqaatit pingaarnersaat. Aappaattullu: Tuniniagassaqartariaqassaaq, sapinngisamillu assigiinngisitaassallutik, oqarpoq, nipisallu suaasa qanittukkut tunisassiarineqalersussat eqqaallugit, saarulliillu tunisassarineqassallutik, tuttullu neqaasa kingusinnerusukkut tuniniarneqalernissaat tikkuartorlugu.

Aamma atuaruk