Kalaaleq Parisimiittoq: Atuagassiaq quiassuaatiginnittartoq Charlie Hebdo pilerngunneqartoq
Franskit aviisiat quiassuaatiginnittartoq Charlie Hebro peqqarniisaartoqarnerata kingorna ullaaq siullermeerluni saqqummeqqippoq. Peqqarniisaarniat suleqataasut aqqaneq marluk toquppaat.
Kalaaleq Parisimi ilinniarnermini najugaqartoq Nikolaj Kleist Burkal KNR-imit oqaloqatigineqarpoq, aviisumut qisuariaatit qanoq innersut, illoqarfiillu pingaarnersaanni inuit qanoq misigisimanersut aperaarput:
- Parisimi eqqissisimaneqarpoq assullu killisimaarnarluni.
Aviisip saqqummeqqaarneranut qanoq qisuariartoqarpa?
- Ullaaq aviisi saqqummeqqaartoq, nungullugu pisiarineqareerpoq. Tassa kioskit ammanngittulluunniit paggatiinnarlugit nunguppaat. Inuit inniminniiortorsimagamik, neriorsuippullu suli 5 milliuninngorlugu naqeqqinniarlugu; tassa pisarnermiit amerlanerujussuanngorlugit, Nikolaj Kleist Burkal Parisimit oqarasuaatikkut taama oqaluttuarpoq.
Aamma atuaruk Kalaaleq Parisimi ippassaq ingerlaaqatigiittoqarmat peqataavoq
Taassuma ilanngullugu oqaatigaa atuagassiaq amerlanerungatsiartunngorlugu naqiterneqaresimasoq. Saapaait-akunneranummi nalinginnaasumik 60.000-it missaat naqiterneqartaraluarmata.
- Uagut kioskit ammannginnerini makiaarujussuarpugut, aviisilli tamarmik tunisaareersimapput. Taqqama inoqaqaaq, kioskit aviisinik nioqquteqartartut tamaasa silataanni aviisisinianik tunuleriiaartoqarpoq.
Soormitaavaana inuit taama amerlatigisut aviisi Charlie Hebdo piumatigigaat?
- Pisariaqarmat, pisut pillugit aammali eqqartorneqartoq pillugu maani Parisimiunuinnaanngitsoq aammali franskinut tamanut. Assut oqallissutaasoq oqarsinnaavugut. Aviisi pillugu assigiinngitsorpassuarnik akerleriinnik isummersortoqarpoq, qisuariaatit assigiinngeqaat.
Aamma atuaruk Kalaallit Frankrigimi pisunut alianartunut misiginneqatiginnipput
Illit nammineq aviisi angumerinngitsoorpat, oqarputilli ikinnguppit pisiaringaa, aviisimut qisuariaatit siulliit qanoq ippat?
- Malugisinnaasakka malillugit avissaartuussutaasunik aviisi nutaaq isummersorfigineqarpoq. Naliginnaasumit mikineruvoq, profetilu saqqaaniitillugu naqinnqarsimavoq, tamannalu akerleriissutaavoq.
- Profetip saqqaaniinnera ilaasa illersoraat, allat akerlerigaat, titartagartaali immini isornartoqanngilaq, tamannalu inuit nuannaraat. Tassa inuit assigiinngiiaartunik isummersorput, amerlanerilli aviisi nuannarigaat, Nikolaj Kleist Burkal Parisimiit oqaluttuarpoq.
Atuagassiaq quiassuaatiginnittartoq Charlie Hebdo 5 millioninngorlugu naqiterlugu saqqummereerpoq, naqiterisitsisartulli marloriaatinngorlugu naqitertinnissaa naatsorsuutigaat.
