ASSIT Kalaaleq Parisimi ippassaq ingerlaaqatigiittoqarmat peqataavoq
Kalaaleq tusagassiortunngorniaq Nina-Vivi Møller Andersen, ilinniarnerminut atatillugu Parisimiittoq, ingerlaaqatigiinnut peqataavoq:
- Pikkunartorujussuuvoq najuuffigalugu. Taavalu inuit pattaatilertaramik, pattaatilernerallu ungasissumiit tusaallugu qanilliartuaartarnera pikkunaqaaq, pattaannerallu uagutsinnut anngukkaangat uannut qamuuna attortinnartorujussuuvoq, tusagassiortunngorniaq Nina-Vivi Møller Andersen oqarpoq.
Inuit nunanit tamalaaneersut ingerlaaqatigiinnermi peqataapput, tusarfiillu assigiinngitsut oqaatigaat inuit 2 millionit pallillugit Parisimi ingerlaaqatigiissimasut. Inuillu taama amerlatigisut katersuunneranni arlaannik pisoqariataarsinnaanera aamma ernummatigineqarsimavoq:
- Annilaangalaarpunga, pissutigalugu franskit arlallit arlaannik pisoqariataarsinnaanera aamma ernummatigigamikku, assersuutigalugu qaartitsisoqarsinnaanera ernumassutigigamikku. Uanga aamma soorunami qanoq ingerlanissaa annilaanngatigisimavara, pissanngatigalugulu, Nina-Vivi Møller Andersen oqarpoq.
Inuppassuit taama ingerlaaqatigiimmata pattattarniarlutillu erinarsuataartarnerat Nina-Vivi Møller Andersenip pikkunanaarsimanerarpaa, allaallumi aamma nassuiaruminaatsillugu:
- Misigisaq pikkunartorujussuuvoq nassuiarneqarsinnaanngitsoq, inuit amerlangaarmata. Taavalu taamatut ingerlaarnitsinni inuit ataqqinnissusertik assigiinngitsutigut takutikkamikku, "Charlie"-mik suaartaqattaarlutik, pattalertarlutik, taavalu inuiattut erinarsuut appittaramikku assut taanna attortinnarpoq, kalaaleq tusagassiortunngorniaq Nina-Vivi Møller Andersen, ilinniarnerminut atatillugu Parisimi qaammatini makkunani ilinniartoq taama oqarpoq.
Inuit millionilikkaat Parisimi taama ingerlaaqatigiimmata, nunat assigiinngitsut 60-it naalakkersuinikkut siuttui aamma peqataapput.
